Солтүстік Қазақстан облысындағы «Eurasian Milk» сүт зауытында қоюлатылған сүт өндіру цехын іске қосылды. Бұл туралы Ауыл шрауашылығы министрлігі хабарлады. Жылына 12 мың тонна өнім шығаратын жобаның инвестициялық көлемі 5,2 млрд теңге. Кәсіпорын технологиялық жарақтандырылу жағынан республика көлемінде алдыңғы қатарда, яғни барлық өндірістік желілер жетекші еуропалық өндірушілерден жеткізілген. Өндіріс тек Солтүстік Қазақстан облысы фермерлерінен жеткізілетін шикізаттан толықтай табиғи әрі жоғары сапалы өнім шығаруға бағытталған.
«Мұндай өндірісті іске қосу Президенттіміздің ауыл шаруашылығы өнімдерін терең өңдеуді дамыту жөніндегі тапсырмасының орындалуының тағы бір нақты дәлелі. Бұл – жаңа жұмыс орындары, инвестициялар мен қосылған құн, сондай-ақ елдің азық-түлік қауіпсіздігін нығайтуға қосылып жатқан үлестің көрсеткіші. Әсіресе, кәсіпорынның жергілікті шикізатты және заманауи технологияларды пайдалануы отандық өнімнің бәсекеге қабілеттілігін арттырады», — деді Ауыл шаруашылығы министрі Айдарбек Сапаров.
Осы күні Айдарбек Сапаров «Qyzyljar» арнайы экономикалық аймағы аумағында ашылған саңырауқұлақ фермасының да тыныс-тіршілігімен танысты. Отандық инвестордың бастамасымен жүзеге асырылған жоба өңдеуді дамытуға, импортты алмастыруға бағытталған.
Өндіріс Польшада шығарылған заманауи жабдықтармен жарақтандырылған, материалдар Еуропадан әкелінген. Жобалық қуатқа шыққаннан кейін ферма жылына 2 400 тонна шампиньон және 4 000 тонна компост өндіре алады, бұл елдегі саңырауқұлақ өнімдеріне деген сұраныстың шамамен 25%-ын қамтамасыз ете алады. Жоба аясында 65 тұрақты жұмыс орны ашылды.
Сурет: АШМ
