Солтүстік Қазақстан облысында енгізілген шектеу шаралары алынып тасталды, деп хабарлады qazaqstan.tv.
Жыл басынан бері 500 бастан аса малдан қауіпті инфекция анықталып, 3 адам ауру жұқтырған. Оның екеуі жасөспірім. Бруцеллезге шалдыққан малдың 90 пайызы ірі шаруашылықтарға тиесілі. Инфекция таралмау үшін Тимирязев, Қызылжар, Ақжар және Айыртау аудандарындағы 4 серіктестік пен бірнеше елдімекенде шектеу шаралары енгізілген болатын. Облыстық ветеринария басқармасының мәліметінше, соңғы рет алынған сынамаға сәйкес малдардың бруцеллез жұқтырмағаны анықталған. Жалпы жыл басынан бері 800 мыңға жуық сынама алынып, талдау жасалыпты.
«Малға бруцеллезге қарсы вакцина қою үшін, ең алдымен мал иелері өздері ұсыныс беруі қажет. Бұл вакцина тегін қойылмайды. Аурудың таралуына жол бермеу үшін ветеринария мамандары вакцина салдыруға кеңес береді», — деді облыстық ветеринария басқармасының баспасөз хатшысы Аманжол Нұртазин.
