2025 жылдың 30 сәуірінен бастап Қазақстан аумағынан үшінші елдерге және Еуразиялық экономикалық одақ елдеріне еркек тайыншалар мен тоқтыларды экспорттау квотасын бөлу қағидалары күшіне енеді. Бұл норма алты ай қолданылады, деп хабарлады Ауыл шаруашылығы министрлігінің баспасөз қызметі.
12 айдан асқан еркек тайыншаларды сыртқа шығару сандық лимиті 60 мың бас, оның ішінде бордақылау алаңдары үшін – 40 мың бас, тауар өндірушілер үшін – 20 мың бас.
4 айдан асқан еркек тоқтыларды сыртқа шығару сандық лимиті 120 мың бас, оның ішінде бордақылау алаңдары үшін – 60 мың бас, тауар өндірушілер үшін – 60 мың бас.
Қазақстан Республикасының аумағынан 12 айдан асқан еркек тайыншаларды сыртқа шығаруға квота алу үшін бір бордақылау алаңына арналған лимит бір жолғы немесе жиынтық мөлшерде бордақылау алаңы қуатының 30 пайызынан аспауы тиіс, ал бір тауар өндірушіге – квота қолданысының бүкіл кезеңінде 500 бастан аспауы керек.
Қуаттылығы 13 000 бас және одан да көп бордақылау алаңдары үшін 12 айдан асқан еркек тайыншаларды сырт елдерге шығаруға арналған лимит квота қолданысының бүкіл кезеңінде 4000 бастан аспауы тиіс.
Қазақстан Республикасының аумағынан 4 айдан асқан еркек тоқтыларды сырт елдерге шығаруға квота алу үшін бір бордақылау алаңына арналған лимит біржолғы және жиынтық мөлшерде бордақылау алаңы қуатының 30 пайызынан аспайды, ал бір тауар өндірушіге – квота қолданысының бүкіл кезеңінде 500 бастан аспауы керек.
Қуаттылығы 5000 бас және және одан да көп бордақылау алаңдары үшін 4 айлық еркек тоқтыларды сырт елдерге шығаруға арналған лимит квота қолданысының бүкіл кезеңінде 1500 (бір мың бес жүз) бастан аспауы тиіс.
Квота бөлу сәтінде бордақылау алаңындағы немесе тауар өндірушідегі малдың нақты саны карантиндеуге өтінім берген кезде тіркелген квотаның сұратылған көлемінен екі есе көп болуы тиіс.
Сырт елдерге шығаруға жоспарланған жануарлар ауыл шаруашылығы жануарларын бірдейлендіру жөніндегі дерекқорда өтініш берушінің – бордақылау алаңының немесе тауар өндірушінің атына карантинге қоюға дейінгі 3 айға дейінгі мерзімде тіркелген болуы тиіс.
Квота эпизоотиялық зерттеп-қарау актісінің қолданылу мерзімі ішінде жарамды және сәйкесінше жануарларды сырт елдерге шығару осы мерзімдерде жүзеге асырылады.
Квоталар «Е-лицензиялау» порталында бөлінеді және «Сандық шектеулер (квоталар) енгізілген кезде тауарлардың жекелеген түрлерінің экспортына және (немесе) импортына лицензия беру» мемлекеттік қызмет көрсету қағидаларына сәйкес жекелеген тауар түрлерін экспорттауға лицензия алу кезінде автоматты түрде беріледі.
Бұйрықпен толығырақ осы сілтеме арқылы танысуға болады: http://zan.gov.kz/client/#!/doc/209556/kaz
«Сандық шектеулер (квоталар) енгізілген кезде жекелеген тауар түрлерін экспорттауға және (немесе) импорттауға лицензия беру» мемлекеттік қызметін көрсету қағидаларымен толығырақ осы сілтеме арқылы танысуға болады: https://www.gov.kz/memleket/entities/moa/documents/details/adilet/V2300033571?lang=kk.
Сурет: Agrotrend.kz
