Шымкент қаласында жылына 155 мың тонна қызанақ өндіруге есептелген еліміздегі ең ірі жылыжай кешендерінің бірінің салтанатты ашылу рәсімі болды, деп хабарлады Ауыл шаруашылығы министрлігінің баспасөз қызметі.
Іс-шараға Ауыл шаруашылығы министрі Айдарбек Сапаров, Түркия Республикасының Түркістандағы Бас консулы Левент Гюржан, түрік «Alarko Holding» холдингінің басқарма төрағасы Иззет Гарих, сондай-ақ Шымкент қаласы әкімдігі өкілдері қатысты.
Айдарбек Сапаровтың айтуынша, түрік инвесторларымен бірлесіп жалпы құны 1,1 млрд АҚШ долларын құрайтын 14 жоба жүзеге асырылуда.
Айта кетейік, жалпы құны 650 млн АҚШ долларын құрайтын ірі инвестициялық жобаның құрылысы былтыр жазда басталған. Кешеннің жылдық өндірістік қуаты 155 мың тонна, аумағы 650 гектар, бірінші кезең оның 208 гектарын қамтиды.
Жыл соңына дейін кешеннің 40 гектар учаскесі пайдалануға берілмек. Бұл өндіріс көлемін ұлғайтып, ішкі нарықты жаңа піскен көкөніспен қамтамасыз етуге жол ашады. Бастапқы кезең толық іске қосылғаннан кейін 2 мың жұмыс орны, ал жоба толық аяқталғанла 5 мың жұмыс орны ашылмақ.
Бүгінде еліміздегі жылыжайлар 1,3 мың гектарға орналастырылған. Олар жылына 200 мың тонна көкөніс өндіреді.
Сурет: АШМ
