Шығыс Қазақстан ауыл шаруашылығы тәжірибе станциясының базасында майлы және жарма дақылдар тұқымын өңдейтін заманауи зауыттың құрылысы басталады, деп хабарлады Ауыл шаруашылығы министрлігінің баспасөз қызметі.
Ол мемлекеттік инвестициялық жоба аясында жүзеге асырылады. Басты мақсат – отандық тұқым шаруашылығын дамыту және аграрлық сектордың импортталатын тұқымға тәуелділігін азайту.
Жоғары технологиялық жаңа кешен ауыл шаруашылығы тауар өндірушілерін Солтүстік пен Шығыс Қазақстанның климаттық жағдайларына бейімделген, сапалы әрі бәсекеге қабілетті соя мен күнбағыс тұқымымен қамтамасыз етуге мүмкіндік береді.
Тәжірибе станциясы жоғары өнімді, ерте және тез пісетін соя сорттары мен күнбағыс будандарын шығару бағытында жүйелі түрде селекциялық-тұқым шаруашылығы жұмыстарын жүргізіп келеді.
Кәсіпорын элиталық тұқым шаруашылығы мәртебесіне ие және күнбағыс, соя, жаздық және күздік бидай, сондай-ақ мал азығы дақылдар сорттары мен будандарын шығарады.
Жоба аясында тұқымдарды 95–99%-ға дейін тазарту деңгейін қамтамасыз ететін заманауи жоғары технологиялық жабдықтармен толық қамтылған цифрлық кешен құру қарастырылған. Өңдеу процесі тұқымдарды бөлу, тазалау, өңдеу, дәрілеу және қаптау кезеңдерінен тұрады. Тұтынушыларға отандық және халықаралық сапа талаптарына сай, егіске дайын сертификатталған тұқымдар ұсынылады.
Сурет: Agrotrend.kz
