«Экспорттық партияларды шоғырландыру» бағдарламасы аясында 4 келісімшарт жасалды, деп хабарлады АШМ ресми сайты. Азық-түлік келісімшарт корпорациясы 2024-жылдың қыркүйегінде фермерлерді қолдау үшін «Экспорттық партияларды шоғырландыру» бағдарламасын іске қосқан еді.
Бағдарламаның негізгі мақсаты – элеваторларды босату, шағын және орта ауыл шаруашылығы өндірушілерінің астықты экспортқа шығаруын ынталандыру.
Бағдарламаның шарттары бойынша Азық-түлік корпорациясы фермердің астығын сатып алмай, тауар партияларын шоғырландырады және тасымалдауды толық сүйемелдей отырып, оны өтеусіз негізде экспортқа шығаруды ұйымдастырады. Валюталық кіріс фермерге тікелей түседі.
Бүгінгі таңда Азық-түлік корпорациясының қатысуымен қазақстандық фермерлерден 14,5 млн АҚШ доллары сомасына ауыл шаруашылығы өнімін жеткізуге импорттаушылармен 4 экспорттық келісімшарт жасалды. Пилоттық келісімшарт жасасу оң тәжірибе көрсетті.
Сондай-ақ Қырғызстан, Қытай, Иран және Түркиядан келген импорттаушылардан 2-класты бидай, зығыр, күнбағыс және арпа сатып алу бойынша коммерциялық ұсыныстар түсті.
Сурет «Қазақстан темір жолы» ҰК» АҚ
