Облыс әкімі Берік Уәли Семей қаласында ет комбинатын салуды жоспарлап отырған инвесторлармен кездесті. «Eurasia Agro Semey» ЖШС құрылтайшылары аймақ басшысына жобаларын таныстырды. Бұл туралы облыс әкімдігінің баспасөз қызметі хабарлады.
Кәсіпкерлер Жаңасемей ауданында қуаттылығы ауысымына 35 тонна ет және ет өнімдерін қайта өңдеуге мүмкіндік беретін ауқымды инвестициялық жобаны жүзеге асыруды көздеп отыр.
Австралияның заманауи технологиясымен жабдықталатын ет комбинаты жобасының құны 8,4 млрд теңгені құрайды. Жоба іске асқанда 250 адам тұрақты жұмыспен қамтылады.
Комбинаттың қуаттылығы ауысымына 200 бас ірі қара мал және 1400 бас ұсақ мал союға мүмкіндік береді. Жылына 12600 тонна дайын өнім өндіріліп, шет мемлекеттерге экспортталады. Жоба аясында 50 мың қой, 200 бас жылқы және 200 бас ірі қара малға арналған бордақылау алаңдарын құру көзделуде.
Аймақ басшысы мұндай ауқымды инвестициялық жобаның өңір үшін маңызы зор екенін атап өтті.
«Абай облысында ауыл шаруашылығы, оның ішінде мал шаруашылығы ежелден жақсы дамыған. Аймақтың аграрлық әлеуеті зор. Өңірде мал өсірумен айналысатын көптеген шаруа қожалықтары бар. Олар қазіргі таңда өсірген малдарын өткізе алмай қиындық көріп жүр. Семейде ірі ет комбинаты салынса облыстың мал шаруашылығы саласына серпін берері анық. Әкімдік тарапынан тиісті, барлық қажетті қолдауды көрсетеміз. Сондай-ақ, кәсіпорынды малмен қамтамасыз ету үшін аудандарда мал бордақылау алаңдарының санын көбейтеміз. Бұл өз кезегінде шаруаларға да, ет комбинатына да тиімді болады» деді облыс әкімі.
«Eurasia Agro Semey» ЖШС құрылтайшылары ағайынды Сайлау, Ерлан Мұқашевтар кездесуде құрылысты бастауға дайын екендерін жеткізді. Аймақ басшысы мамыр айында кәсіпорынның іргетасын қалау шарасын өткізуге уағдаласты.
Сурет облыс әкімдігінің фейсбуктағы ресми парақшасынан алынды
