Қызылорда облысында әлеуметтік маңызы бар азық-түлік тізіміне жататын картоптың бағасы бүгінде тұрақты әрі тұрақтандыру қорында жеткілікті көлемде сақтаулы, деп хабарлайды аймақтың Ауыл шаруашылығы және жер қатынастары басқармасы.
«Қазіргі уақытта тұрақтандыру қорында жалпы көлемі 1000 тонна картоп өнімі сақтаулы. Өнім әлеуметтік дүкендер желісіне 143 теңгеден, ірі сауда үйлеріне 158 теңгеден беріліп жатыр. Ал нарықта бағасы 400 теңгеден. Әлеуметтік маңызы бар азық-түлік түрлерінің қымбаттауына жол бермеу үшін тұрақты мониторинг жүргізіледі. Сондай-ақ, қаламыздағы 37 әлеуметтік дүкен мен 21 үй жанындағы дүкен және 10-нан аса ірі сауда үйлері арқылы тұрақтандыру қорының өнімдері 10-15%-ға төмен бағада сатылып жатыр», — делінген хабарламада.
Бүгінгі таңда облыстың тұрақтандыру қорында құны 1 млрд 241,6 млн теңге болатын 3 869,3 тонна азық-түлік бар. Бұдан бөлек, келісімшартқа сәйкес әлі де жеткізушілерде жалпы сомасы 518,9 млн. теңге болатын 8 665,5 тонна өнім қоры бар екен.
Сурет облыс әкімдігінің әлеуметтік желісінен алынды
