Қырғыз елінің Ауыл шаруашылығы министрлігі ветеринария саласындағы кадр тапшылығын азайту және жас мамандарды ауылдық әрі қолжетімділігі төмен өңірлерге тарту мақсатында «Жас ветеринар: тұрғын үй және мансап» атты пилоттық бағдарламаны іске қосу жөнінде Үкімет қаулысының жобасын дайындап жатқанын мәлімдеді. Бұл туралы 24KG хабарлады.
12 айға жоспарланған пилоттық бағдарламаға 60 жас ветеринар қатыса алады. Бағдарламаға қатысушылар ауылдық жерлерде кемінде 5 жыл жұмыс істеуге міндеттеледі.
Инициатива аясында жас мамандарға:
• көтерме қаржылай төлемдер,
• болашақта ипотекалық бастапқы жарна үшін депозитке ай сайынғы жинақтар,
• тұрғын үйді жалға алу шығындарын өтеу немесе қызметтік тұрғын үймен қамтамасыз ету
сияқты қолдау шаралары қарастырылған.
Министрліктің айтуынша, «тұрғын үй + мансап» моделі ветеринариялық қадағалау жүйесін нығайтып, мемлекеттік қызметтердің сапасын арттыруға және ауылдық аумақтардың дамуына оң әсер етеді.
Сонымен қатар, Ауыл шаруашылығы министрлігі аталған бастамаға қатысты ұсыныстар мен пікірлерге ашық екенін білдіріп, азаматтарды өз идеяларын жолдауға шақырды.
Сурет: ашық ақпарат көзінен
