ҚР Президенті жанындағы ОКҚ-да өткен баспасөз конференциясында ҚР Ауыл шаруашылығы вице-министрі Бағлан Бекбауов ведомство тарапынан аграрлық секторды цифрландыру бойынша қабылданып жатқан шаралар туралы хабарлады. Бұл туралы министрліктің ресми сайтында жарияланды.
«ІТ-құралдарын енгізу ауыл шаруашылығы өндірісінің өнімділігін ғана емес, өнімдердің бәсекеге қабілеттілігін арттыруға да мүмкіндік береді. Цифрландырудың арқасында өндіріс көлемімен қатар елдің экспорттық әлеуетін арттыру үшін жағдай жасалуда және ҚР АШМ теңгерімінде 4 ақпараттық жүйе бар», — деп атап өтті спикер.
Оның ішінде субсидиялаудың бірыңғай мемлекеттік ақпараттық жүйесі, «Ауыл аманаты» ақпараттық жүйесі, ауыл шаруашылығы жануарларын сәйкестендіру, «e-Agriculture» АӨК салаларын басқарудың бірыңғай автоматтандырылған жүйесі бар.
2023-жылдан бастап АШМ 14 бағыт бойынша мемлекеттік қолдау шараларын көрсететін Субсидиялаудың мемлекеттік ақпараттық жүйесін іске қосты. Жүйеде қызмет алушы ретінде 90 мыңнан астам пайдаланушы, 350-ден астам қаржы институты тіркелген. 2024 жылы ГИСС арқылы 123 мыңнан астам өтінім келіп түсті, 67 мың өтінім мақұлданды, 40 858 өтінім қаралуда.
Сүт пен ет өндірісінің құнын арзандату, сатып алынған техниканы, өсімдіктерді қорғау құралдарын, тыңайтқыштар мен жоғары сапалы тұқымдарды субсидиялау үлкен сұранысқа ие.
АШМ «Ауыл аманаты» бағдарламасы бойынша шағын несиелендірудің ақпараттық жүйесін әзірледі. Кредиттеу процестерін автоматтандыру онлайн-режимде өтінім беруді қамтамасыз етуге, микрокредит беру процестерін жеделдетуге және оңтайландыруға, шешім қабылдауға адам факторларының қатысуын төмендетуге, сондай-ақ деректерге егжей-тегжейлі мониторинг пен талдау жүргізуге мүмкіндік береді.
Мал шаруашылығында қадағалауды қамтамасыз ету үшін барлық циклды (оның ішінде мал шаруашылығы өнімдерін) автоматтандыру жұмысы жүргізілуде, «Ауыл шаруашылығы жануарларын сәйкестендіру», «Агроөнеркәсіп кешені салаларын басқарудың бірыңғай автоматтандырылған жүйесі» ақпараттық жүйелері пайдаланылады.
Сондай-ақ, өсімдік шаруашылығын қадағалаудың жаңа ақпараттық жүйесі енгізілуде, ол «егістіктен дастарханға дейін» қағидаты бойынша агроөнеркәсіп өнімінің өндірісі мен шығу циклін қадағалауға, өсімдік шаруашылығында өндірілетін өніммен субсидиялаудың тиімділігін бағалауға мүмкіндік береді.
АӨК цифрландырудың соңғы кезеңі «Е-АӨК» платформасын енгізу.
Ауыл шаруашылығын цифрландыруға кешенді тәсілді қамтамасыз ету және агроөнеркәсіп кешенінің бірыңғай цифрлық платформасын құру мақсатында барлық бизнес-процестерді толық автоматтандыру және цифрландыру арқылы ауыл шаруашылығы саласын цифрлық трансформациялауды жүргізу үшін барлық қолда бар ақпараттық жүйелерді біріктіру жоспарланып отыр.
Сурет АШМ ресми сайтынан
