Қостанайдағы Локализациялық орталық базасында John Deere брендінің өздігінен жүретін, тіркемелі және аспалы техника өндірісі ресми түрде іске қосылды, деп хабарлады Ауыл шаруашылығы министрлігінің баспасөз қызметі.
Жаңа өндірістің іске қосылуы отандық машина жасауды дамытудағы және Қазақстанның аграрлық секторына озық технологияларды енгізудегі маңызды қадам. John Deere – ауыл шаруашылығы техникасын өндіруде әлемдік көшбасшы бренд.
Өндіріс «AGROMAŞ» зауытының Локализация орталығында іске асырылады. Бұл еліміздегі ауыл шаруашылығы техникасы саласындағы ең ірі локализацияланған өнеркәсіп алаңы.
«Елімізде жүзеге асып жатқан саяси және экономикалық реформалардың арқасында біз АҚШ-тың ауыл шаруашылық техникасының озық бренді – John Deere-мен өндірістік кооперация құру мүмкіндігіне ие болдық. Бұл – тарихи оқиға. Мұндай жоғары технологиялық жобалар нәтижесінде біз тек жаңа жұмыс орындарын ашып, инновациялық технологияларды меңгеріп қана қоймай, қазақстандықтардың инженерлік ойлау қабілетін қалыптастырып жатырмыз», – деп атап өтті AGROMASH зауытының президенті Динара Шукижанова.
John Deere бренді бойынша жергілікті өндірістің іске қосылуы Қазақстан фермерлері үшін жаңа мүмкіндіктерді ашады. Атап айтқанда жергілікті жағдайларға бейімделген ауыл шаруашылығы техникаларының ассортиментін кеңейту, сондай-ақ мемлекеттік бағдарламалар бойынша техника сатып алу мүмкіндігі қарастырылған.
John Deere брендінің Қазақстандағы ресми өкілі – «Eurasia Group» компаниясы. Жоба аясында олар ауыл шаруашылығы техникаларын Қазақстанда өндірілген өнімдер ретінде сатуды жалғастырып, сонымен қатар сервис қызметтерін көрсетуді және аграрлық секторға цифрлық шешімдерді енгізуді қамтамасыз етеді.
Сонымен қатар жобаны жүзеге асыру аясында экономика мен білім саласының дамуына қосымша ресурс жұмсауды көздейді. Нақты айтқанда, ауыл шаруашылығы саласында қызмет көрсету және арнайы мамандарды, агрономдарды, инженерлерді, механизаторлар мен IT мамандарды даярлайтын болады.
Алдағы 5 жылда үш заманауи сервис орталығы салынып, олар цифрлық технологияларды енгізу және агроөнеркәсіп кешенінің тиімділігін арттыру үшін негізгі алаңдарға айналады.
AGROMASH өнеркәсіптік кооперацияны кеңейту аясында басқа да батыс брендтерін локализациялауды жалғастырады. Бұл Қазақстан нарығында локализацияланған ауыл шаруашылығы техникаларының үлесін арттыруға мүмкіндік береді.
Бүгінде Локализация орталығы базасында әлемнің жетекші брендтерінің, соның ішінде JOHN DEERE, LOVOL, DEUTZ-FAHR, КИРОВЕЦ, ГОМСЕЛЬМАШ, AMAZONE, CLAAS және басқалардың ауыл шаруашылығы техникасы мен компоненттерінің өндірісі шоғырланған.
Қостанай облысы Қазақстандағы ауыл шаруашылығы техникасын өндіру бойынша ең ірі кластер ретінде жұмыс істейді, елдің индустриалды және аграрлық секторындағы маңызды орталығына айналады.
Сурет: АШМ
