«Восток-1» тауарлы сүт фермасы Солтүстік Қазақстан облысының табысты тәжірибесін тираждау жөніндегі бағдарламаның нәтижесі. Жобаның құны 6,2 млрд теңге. Ферманың өндірістік қуаты жылына 9 700 тонна сүт. Фермада шведтік DelavalExportab компаниясы шығарған «Карусель» типті айналмалы сауу залы бар заманауи жабдықтар орнатылған. «AGRAL FARM» ЖШС жеткізген қора жабдықтарын монтаждау жұмыстары аяқталды. Қазіргі уақытта бұзау қорасы мен төлдеу залына жабдықтар орнатылып жатыр. Бұл туралы Ауыл шаруашылығы министрлігінің баспасөз қызметі хабарлады.
2024-жылы Даниядан Гольштейн-фриз тұқымының 400 құнажын әкелінді, биыл тағы 800 бас құнажын әкелу жоспарлануда.
Наурыз айында екінші қораның құрылысы басталады. Өңірде сүтті мал шаруашылығын дамытудағы маңызды қадамның бірі – Каменскорал ауылында 1,2 мың басқа арналған екінші тауарлы сүт фермасын салу. Құны 4,3 млрд теңге болатын жобаны 2025-жылдың желтоқсанында аяқтау жоспарлануда.
Жалпы, 2028-жылға дейін Қостанай облысында 30 тауарлы сүт фермасын құру жоспарлануда, бұл сүт өндіру көлемін жылына 150 мың тоннаға ұлғайтуға және сүт өнімдерінің импортына тәуелділікті төмендетуге мүмкіндік береді.
Сурет: АШМ
