Жылына 10 мың тоннаға дейін форель мен баррамунди өсіруге маманданатын заманауи балық өнеркәсібі кешені құрылысының бірінші кезеңі аяқталды, деп хабарлайды Ауыл шаруашылығы министрлігінің баспасөз қызметі. «Оспанова Девелопмент» компаниясы іске асырып жатқан жобаның жалпы құны 67,3 млрд теңге.
35 гектар жерге салынып жатқан кешеннің құрылысы 2021-жылы басталған болатын. 2023-жылдың қазан айында 25 мың дана форель мен баррамунди шабақтарын алғаш суға жіберу сынағы сәтті өтті.
2024-жылы құрылыстың бірінші кезеңі аяқталды. Кешенге технологиялық, әкімшілік-тұрмыстық және инженерлік-техникалық блоктар кіреді. Әкелінетін балықты жіберуге арналған бассейндер, сүзгі қондырғылары, инкубациялық резервуарлар, тірі жем өсіру цехтары, соның ішінде артемия мен коловраттар бар.
Кешен толық іске қосылғанда жылына 10 мың тоннаға дейін балық өндіре алады. Өнімді Қазақстан мен ТМД елдеріне өткізу жоспарланып отыр.
Сурет: АШМ
