Қазақстанның Ауыл шаруашылығы министрлігі қытайлық Eavision компаниясымен 80 агродрон әкелу жөніндегі меморандумға қол қойды. Бұл аппараттар зиянкестер мен өсімдіктердің қауіпті ауруларына қарсы емдеу жүргізу үшін ауыл шаруашылығы өндірушілеріне сатылады. Сонымен қатар, Sunkar Eavision International LLP Қазақстан-Қытай бірлескен кәсіпорны құрылды, ол «Алатау» ақпараттық технологиялар паркінің аумағында дрондарды жинайды, деп хабарлады Үкіметтің баспасөз қызметі.
Вице-премьер Серік Жұманғариннің төрағалығымен өткен Үкімет отырысында ауыл шаруашылығында агродрондарды пайдалану мен қолданудың тиімділігі қаралды.
«Өңірлердің ӘКК-мен бірлесіп Түркістан, Тараз, Абай және Жетісу облыстарында агродрондардың демонстрациялық және сервистік орталықтарын ашу мәселесі пысықталды. Үш оқу орны: Талғар политехникалық колледжі, Семейдегі АТ-технологиялар колледжі және Түркістан облысы Қапланбек ауыл шаруашылығы колледжі негізінде құрастырушылар мен ұшқыштарды оқыту мәселесі шешілді», — деді ауыл шаруашылығы вице-министрі Ермек Кенжеханұлы.
Сонымен қатар, зиянкестер шоғырланған орындарды зерттеу және залалсыздандыру үшін қажетті жұмыстар жүргізілуде. «Қазақстан Ғарыш Сапары» ақпараттық жүйесінде – «ФитоКЗ» ГАЖ-да жүргізілген өңдеулермен зерттеу іс-шараларын байланыстыру көзделген.
Әлемнің 100-ден астам елінде агродрондарды қолдану тәжірибесі жердегі бүріккіштердің орнына ұшқышсыз ұшақтарды пайдаланудың артықшылықтарын көрсетеді. Әлемде агродрондардың көмегімен 500 млн гектардан астам алқапқа өңдеу жұмыстары жүргізіледі. Бұл шамамен 210 млн тонна суды үнемдеуге, СО2 эмиссиясын 25 млн тоннаға азайтуға мүмкіндік береді. Агродрондар қашықтағы жерлерді өңдеуге және зерттеуге мүмкіндік береді. Олар кез келген ауа-райы жағдайында және тәуліктің кез келген уақытында жұмыс істей береді.
Серік Жұманғарин Цифрлық даму, инновациялар және аэроғарыш өнеркәсібі министрлігіне агродрондарды басқару үшін өзінің бағдарламалық әзірлемелерді дайындау мүмкіндігін зерттеу міндетін қойды. Сондай-ақ, ҚазАгроҚаржыға қолда бар қаражатпен фермерлерге ауыл шаруашылық дрондарын сатып алуға қолдау көрсету шараларын әзірлеуді тапсырды.
Сурет ашық ақпарат көзінен алынды
