ҚР Ауыл шаруашылығы министрі Айдарбек Сапаров пен ҚХР Бас кеден басқармасының басшысы Сунь Мэйцзюнь Қазақстан мен Қытай арасындағы құс етін импорттау және экспорттау кезінде инспекциялық, карантиндік және азық-түлік қауіпсіздігіне қойылатын талаптар туралы Хаттамаға қол қойды, деп хабарлады министрліктің баспасөз қызметі.
Бұл құжат елдің агроөнеркәсіп кешенінің экспорттық әлеуетін кеңейту жөніндегі ведомствоның жүйелі жұмысының нәтижесі болды.
Ведомствоның мәліметінше, бүгінгі таңда ҚХР-мен мал шаруашылығы өнім түрлері бойынша 11 хаттамаға қол қойылды. Қытайға экспорттауға рұқсат етілген атаулар тізбесіне өсімдік және мал шаруашылығы өнімдерінің 29 түрі енгізілген. Экспорттаушылар тізіліміне 2483 қазақстандық кәсіпорын енгізілген. Жаңа Хаттамаға қол қою нәтижесінде тізілімге тағы 88 өндіруші енгізіледі.
Кездесуде ведомство өкілдері аграрлық саладағы екіжақты ынтымақтастықты кеңейту және сауда-экономикалық байланыстарды нығайту мәселелерін талқылады.
«Біздің мемлекеттеріміздің басшылары, әсіресе агроөнеркәсіп саласындағы ынтымақтастықты тереңдетудің стратегиялық маңыздылығын бірнеше рет атап өтті. Біздің міндетіміз — Қытай нарығына түсетін өнімнің сапасы мен қауіпсіздігінің жоғары стандарттарын қамтамасыз ету үшін барлық жағдайды жасау», — деп атап өтті Айдарбек Сапаров.
Ауыл шаруашылығы министрлігінің мәліметінше, 2024 жылы Қазақстан мен Қытай арасындағы АӨК өнімінің тауар айналымы 1,4 млрд долларды құрап, 10,5%-ға ұлғайды. Экспорттың үлесі 1,05 млрд долларды құрады. Экспорттың негізгі бөлігін жем, астық, майлы дақылдар және өсімдік майлары құрады: 2024 жылы Қытайға жем экспорты 485%-ға, өсімдік майы 26%-ға, рапс майы 57%-ға өсті. 2025 жылғы қаңтар-наурызда АӨК тауар айналымы 45%-ға өсіп, 430,5 млн долларға жетті, оның ішінде экспорт 301,9 млн долларды құрады (өсім 42%).
Қазақстан қолданыстағы ветеринариялық және фитосанитариялық хаттамаларды өзектендіруге, қазақстандық мал шаруашылығы кәсіпорындарына инспекциялар жүргізуге, өсімдік шаруашылығы өнімдері — күріш, мақта тұқымдары, бақша дақылдары, маш үшін Қытай нарығына қолжетімділікті кеңейтуге бастамашы болды. Басымдықтардың қатарында астық экспортының көлемін ұлғайту бар. Екі жыл ішінде (2023-2024) ҚХР-ға жыл сайынғы астық өнімдерін жеткізу 1,4 млн тоннаны құрады, бұл ретте 2024 жылғы қыркүйектен 2025 жылғы сәуірге дейін экспорт 27%-ға өсіп, 1,859 млн тоннаға жетті.
Сурет: АШМ
