Қарағанды облысында суармалы алқаптарды ұлғайту қарқыны күрт өсті, деп хабарлады аймақ әкімдігінің баспасөз қызметі. Биыл өңір фермерлері жүзден астам жаңбырлатып суару машинасын орнатады. Шығынның жартысын мемлекет өтейді.
Өңірде суармалы жерлерді қалпына келтіру бойынша Жол картасы іске асырылуда.
«Биыл жоспар бойынша суармалы жерлердің аумағы 8,7 мың гектарға ұлғайтылуы тиіс, алайда одан да ауқымды етуге мүмкіндік бар. Суару технологиясын қолданғанның арқасында өнімділік 4-тен 15 есеге дейін өседі. Тәуекелі үлкен егін шаруашылығы үшін бұл өте маңызды. Жаңбырлатып суару машиналары қымбат, оған қоса инфрақұрылым тарту жұмысы тағы бар. Бірақ өнімділік жоғары болғандықтан өзін-өзі ақтайды. Мемлекеттік қолдау бар. Жеңілдетілген несиелер және суару жүйелеріне жұмсалатын шығынның 50 пайызын өтеу қарастырылған», – дейді Ауыл шаруашылығы басқармасының басшысы Әнуар Төлібеков.
Басқарма басшысының айтуынша, ұзақ жылдар бойы суармалы егіншілік болмаған жерлер қалпына келтіріледі. Бiрден бiрнеше шаруашылық заманауи суару жүйелерiн орнатпақ.
Сурет: Agrotrend.kz
