Қарағанды облысының Осакаров ауданында екі жылдан бері жергілікті тұрғындарды жайылымдық жерлермен қамтамасыз етуге арналған «Жайлау» жобасы сәтті жүзеге асырылуда, деп хабарлады аудан әкімдігінің баспасөз қызметі. Оның алғашқы пайдасын Сарыөзек, Қарағайлы және Озерный ауылдық округтерінің тұрғындары сезінді. Онда жайылымға 10 500 га жер бөлінген.
«Жайылымдар мен шабындық алқаптардың жетіспеушілігі біздің ауданда ғана емес, барлық жерде байқалады. Аудан тұрғындары бұл мәселені үнемі көтеріп отырады. Біз пайдаланылмайтын жер учаскелерін қайтару бойынша жұмыс жүргізіп жатырмыз, сондай-ақ ауыл шаруашылығы тауарын өндірушілермен жер учаскелерін беру туралы меморандумдар жасаймыз», — деді Осакаров ауданы әкімінің орынбасары Береке Есіргепов.
Барлық жайлауда ұңғымалар бұрғыланды, вагондар, мал суаруға арналған құралдар орнатылған және генераторлар сатып алынған.
Өткен жылы жоба Шідерті ауылдық округіне қарасты жерлерде жүзеге асырылды. Меморандум негізінде «Тайбұрыл-НК» ЖШС өзінің жайылымдық учаскелерінің бірінен 2000 гектар жер берді. Мұнда қазір Ақбұлақ ауылдық округі, Молодежный елді мекені және Шідерті ауылдық округінің тұрғындары малдарын бағып жатыр.
Нияз ауылдық округінде ауданы 3100 гектар жайылымдық жер ұйымдастырылды. Биыл «Жайлау» жобасы Есіл ауылдық округінде де іске асырылды. Көктемде 3,5 мыңнан астам малға жайылымдық жерлер берілді.
