Абай облысында басталған «Қаладан – ауылға» жобасына кәсіпкерлер қолдау білдіре бастады. Бесқарағай ауданындағы «Қалиқанұлы» шаруа қожалығының басшысы Марат Каликов Глуховка ауылдық округіне қарасты Стеклянка ауылына көшіп барам деушілерді қарсы алуға дайын екенін хабарлады.
«Мың бас сиырымыз бар, тауарлы сүт фермамыз жұмыс істеп тұр. Қаладан ауылға келетін азаматтар болса жұмысқа қабылдауға дайынбыз. Бала-шағасымен көшіп келетіндерге үй береміз, мал береміз, жұмысқа орналастырып, 300 мың теңге еңбекақы төлейміз. Жазда мал азығын дайындайтын кезеңде айлық екі еселеніп төленеді. Бізге механизатор, малшы, сауыншы керек. Ауылға келіңіздер, біз сіздерді құшақ жая қарсы аламыз», — деді «Қалиқанұлы» шаруа қожалығының басшысы Марат Каликов.
Бүгінгі таңда шаруашылықта 140-қа жуық адам тұрақты жұмыспен қамтылған. Тауарлы сүт фермасы, сүт өңдеу цехы және жабы тұқымды 1000 бас жылқысы бар. Соңғы жылдары жаңа техника мен мал сатып алып, өндірістік әлеуетін едәуір арттырған.
«Қаладан – ауылға» жобасына қатысушылар мемлекет тарапынан көрсетілетін қолдау шараларымен қатар, тұрақты жұмыс пен ауылда өмір сүруге қажетті мүмкіндіктерге де ие болады.
Айта кетейік, Стеклянка ауылы облыс орталығынан небәрі 30 шақырым жерде орналасқан.
Сурет: облыс әкімдігі
