Лезгин ұлтының өкілі Саладин Юзбеговтің Бұқар жырау ауданы Ақбел ауылына қоныс аударғанына екі жылға жуықтапты. Үй мен базды 5 миллион теңгеге сатып алыпты. Баздың құрылысы аяқталмаған көрінеді. Ішін әктеп, қоршаумен қолайлы етіп бөліп, жарық шамдарын орнатыпты. Үйді де екіге бөліп, құрылыс жұмысын жүргізген. Бірінде өзі тұрады, бірін жұмыскерлеріне әзірлеп қойыпты.
Саладин бұған дейін көліктерге GPS трекер орнататын компанияда басшылық қызметте болған. Бірақ жаны ауылды аңсаған соң, бір-ақ күнде артынып-тартынып ауылға көшіп барған. Балалық шағы Нұра ауданында өтіпті. Әке-шешесі қарапайым еңбек адамдары болған. Шаруаның бәрін көріп өскен Саладинге қорадағы жұмыс қорқынышты емес. Еңбекпен ерте шыңдалған оның ауылға көшудегі мақсат-мұраты әріде жатыр.
Қазір жас фермер қойдың еділбай мен гиссар тұқымын өсіріп отыр. Ауылға көшіп келген бетінде Қостанайдағы белгілі «Қазаққой орталығы» шаруашылығынан 30 бас саулық әкеліпті. Былтыр Түркістаннан 50 гиссар қойы мен асылтұқымды гиссар қошқарын сатып алыпты. Қазірдің өзінде олардың қозылары әжептәуір салмақты.
Бітімі бөлек гиссар тұқымы қошқарының бағасы әлеуметтік желіні дүрілдетіп тұр. Мұндай қошқардың бойы 1 метрден асып, салмағы 190-200 келіге дейін барады. Етті әрі майлы, құйрықты, дүниежүзіндегі барлық қой тұқымының ішінде ең ірісі. Тез өсіп, салмақты да тез жинайды. Етінің де дәмі ерекше көрінеді. Осының бәрін әбден зерттеген фермер тағы да 100 қой аламын деп отыр. Гиссар қойының отаны Тәжікстанға жол тартамын дейді. Асыл тұқымды қошқар әкеліп, селекциялық жұмысты жаңғыртып, қой тұқымын асылдандырмақшы.
«Асылтұқымды екі қошқарым бар. Күтіміне аса жауапкершілікпен қараймын. Уақ малда кездесетін ішек құрт, бруцеллез, қотыр секілді түрлі аурудың алдын аламыз. Ол үшін арнайы екпе салғызамыз. Үш-төрт ай сайын анализ алып отырамыз. Арықтың, жасанды көлдің суын ішпейді. Құдықтың тұщы суын береміз. Күнде қосымша арпа береміз», — дейді С.Юзбегов.
Көктемде қошқарларын сата бастайды. Қазірден алғысы келетіндер көп. Саладиннің әлеуметтік желісі арқылы көріп, біліп қызығушылық танытқан жұрт оның қой тұқымынан алуға асығып жүр.
Ақпарат пен сурет Гагарин а.о. әкімі аппаратының әлеуметтік желісінен алынды.
