Ел өңірлерінде шамамен 2,1 млн гектар ауыл шаруашылығы алқаптары егілді, деп хабарлады Ауыл шаруашылығы министрлігінің баспасөз қызметі.
Көктемгі дала жұмыстары агротехникалық мерзімдерге сәйкес жүргізілуде. Егіс науқаны әсіресе еліміздің оңтүстік өңірлерінде қарқынды жүріп жатыр. Мәселен, Түркістан облысында – 449,2 мың га, Жамбыл облысында – 306 мың га, Жетісу облысында – 292,6 мың га, Алматы облысында – 187,9 мың га жерге егін егілді.
Басқа өңірлерде де егіс жұмыстары басталды: Шығыс Қазақстан облысында – 156,3 мың га, Абай облысында – 138,8 мың га, Қостанай облысында – 85 мың га, Ақмола облысында – 74,8 мың га, Қызылорда облысында – 52,5 мың га, Павлодар облысында – 56,9 мың га, сондай-ақ басқа аймақтарда да егіс жүріп жатыр.
Бүгінгі таңда 942,1 мың га жерге дәнді дақылдар, 242,8 мың га жерге мал азықтық дақылдар, 492 мың га жерге майлы дақылдар, 118,8 мың га жерге мақта, 71,8 мың га жерге көкөністер, 57,7 мың га жерге бақша дақылдары, 32,5 мың га жерге картоп, 15,6 мың га жерге қант қызылшасы, 26,3 мың га жерге күріш және басқа дақылдар егілді.
Егіс науқанын уақтылы әрі тиімді өткізу үшін 866,8 мың тонна минералды тыңайтқыш жеткізуге шарттар жасалды. 254 теңге/литр бағамен (нарықтық бағадан 15% төмен) 401 мың тонна дизель отыны бөлінді.
Биылғы жылға арналған тұқым қажеттілігі 2,3 млн тонна. Қамтамасыз етілу деңгейі – 100%. Зертханалық тексеріс нәтижесінде тұқымның 99%-ы кондициялық деп танылды.
Ауыл шаруашылығы министрлігі көктемгі егіс науқанының барысына мониторинг жүргізуді жалғастырып, өңірлерге қажетті әдістемелік және ұйымдастырушылық қолдау көрсетуде.
Сурет: Agrotrend.kz
