Қазақстанда майлы дақылдарды қайта өңдеу көлемі тұрақты өсіп келеді, деп хабарлады Ауыл шаруашылығы министрлігінің баспасөз қызметі.
2025 жылғы қаңтар–шілде айларының қорытындысы бойынша өсімдік майын өндіру өткен жылдың сәйкес кезеңімен салыстырғанда 24%-ға артып, 420,5 мың тоннадан 521,2 мың тоннаға жетті. Оның ішінде күнбағыс майының өндірісі 457,7 мың тоннаны құрап, өткен жылғы деңгейден 24,5%-ға жоғары болды (367,8 мың тонна).
Бүгінде елімізде жылына 4,7 млн тонна майлы дақыл тұқымын өңдеуге қауқарлы 88 қайта өңдеу кәсіпорны жұмыс істейді. Ұлттық статистика бюросының деректеріне сәйкес, өндірістік қуаттардың орташа жүктемесі шамамен 35%.
«Экспорттық көрсеткіштер де оң динамиканы көрсетуде. 2024 жылы өсімдік майларының экспорты 29%-ға артты. Негізгі экспорт бағыттары: Қытай Халық Республикасы – жалпы көлемнің 42,4%-ы, Өзбекстан – 35,4%, Тәжікстан – 12,7%, Ауғанстан – 3,2%, Қырғызстан – 1,4%, Латвия және Түрікменстан – 1,8%», — делінген министрлік таратқан ақпаратта.
Өндірістің өсуі майлы дақылдар егіс алқаптарының ұлғаюының негізінде қамтамасыз етілді. 2025 жылы 36%-ға (+1,055 млн га) артты. Мәселен, күнбағыс +481 мың гектарға (ел тарихындағы рекордтық егіс алқабы), зығыр +376 мың гектарға, рапс +173 мың гектарға ұлғайған.
Фермерлер майлы дақылдарды табысты өнім ретінде өсіре бастады.
Сурет: АШМ
