Абай облысының әкімі Берік Уәли Бородулиха ауданына жұмыс сапары аясында «Новая Заря» шаруа қожалығының жұмысымен танысты, деп хабарлады аймақ әкімдігінің баспасөз қызметі.
2007-жылы құрылған қожалық аудандағы алдыңғы қатарлы шаруашылықтардың бірі. Негізгі бағыты – өсімдік шаруашылығы мен сүт бағытындағы ірі қара өсіреді. Мұнда 120 адам еңбек етеді екен. Былтыр 7 665 гектарға егін ексе, биыл бұл көрсеткішті 8 мың гектарға дейін арттыруды жоспарлап отыр. Шаруашылық техника паркін үнемі жаңартып отырады. Соңғы 2 жылда техника алуға 800 миллион теңгеге жуық инвестиция салған.
Мұнда симменталь тұқымды сиырлар өсіріледі. Сүт фермасында шведтік «DeLaval» компаниясының заманауи қондырғысы орнатылған. Жобаға шаруашылық тарапынан 380 миллион теңге жеке қаражат жұмсалған, мемлекеттік бағдарламалар арқылы 58 миллион теңге алған.
Аймақ басшысы егістікпен айналысатын шаруашылықтарда жүзеге асырылған жобаларды жоғары бағалап, заманауи технологияларды енгізу бағытындағы жұмысты жалғастыру керектігін атап өтті.
«Бородулиха өңіріміздегі егіс шаруашылығы дамыған аудандардың бірі. Бүгін осы бағытта жұмыс істеп жүрген шаруашылықтардың жұмысымен таныстым. Бұл серіктестіктер заманауи технологияларды қолдануымен ерекшеленеді. Жаңа техникалар да жеткілікті. Осы бағыттағы жұмысты жалғастыру керек. Облыс әкімдігі тарапынан тиісті қолдау көрсетіледі», — деді облыс әкімі.
Сурет: облыс әкімдігі
