Қазақстан делегациясы ауыл шаруашылығы вице-министрі Ермек Кенжеханұлының басшылығымен Германияда өткен аграрлық іс-шараларға қатысып, стратегиялық келіссөздер жүргізді, деп хабарлады Ауыл шаруашылығы министрлігінің баспасөз қызметі.
Сапар барысында Германияның ауыл шаруашылығы министрі Джем Оздемирмен және Германияның азық-түлік пен ауыл шаруашылығы федералды министрлігінің парламенттік статс-хатшысы О. Никпен кездесулер өтті. Онда Орталық Азия елдері үшін Тұрақты егіншілік жөніндегі өңірлік орталық құру және екіжақты ынтымақтастық мәселелері талқыланды.
Тұрақты егіншілік жөніндегі өңірлік орталық құру туралы идея алғаш рет Қазақстан Президенті Қасым-Жомарт Тоқаевтың 2023-жылы Германияға ресми сапары барысында ұсынылған болатын.
Қазақстандық делегация John Deere, DF Deutsche Forfait AG, BVVG және Innari сияқты жетекші неміс компанияларының өкілдерімен келіссөздер жүргізді. Онда агроөнеркәсіп кешеніндегі бірлескен жобалар мен Қазақстан экономикасына инвестиция салу мүмкіндіктері қарастырылды.
18-19 қаңтар күндері делегация 16-шы Берлин ауыл шаруашылығы министрлері конференциясына және «Grüne Woche» халықаралық көрмесіне қатысты. Қазақстан көрмеде агроөнеркәсіптік әлеуеті мен инвестициялық мүмкіндіктерін таныстырып, халықаралық серіктестермен ынтымақтастық перспективаларын талқылады.
Сапар нәтижесінде Германия компанияларының Қазақстанның ауыл шаруашылығы саласына инвестиция салуға қызығушылығы жоғары екені айтылды.
Сурет: АШМ
