Түркістан облысында 422 мың тонна мақта жиналды. Орташа өнімділік гектарына 24,9 центнерден айналған. Бұл 142,3 мың гектар жерден алынған мақта. Биыл мақта егуге 144,5 мың гектар жер бөлінген, оның 50 мың гектары тамшылатып суару жүйесімен қамтылған. Бұл туралы Ауыл шаруашылығы министрлігінің баспасөз қызметі хабарлады.
Қазіргі заманғы су үнемдеу технологияларымен жабдықталған алқаптардың көбеюі «Түркістан» әлеуметтік-кәсіпкерлік корпорациясы» мен «Түркістан мақта агроөнеркәсіптік кешені» бірлескен жобасы аясында жолға қойылды.
Өткен жылмен салыстырғанда дәстүрлі тәсілмен егілетін алқаптар 9 мың гектарға қысқарды. Тамшылатып суару жүйесіне көшу су ресурстарын тиімді пайдалануға және өнімділікті арттыруға мүмкіндік береді. Бұл еліміздің оңтүстік өңірлері үшін аса маңызды.
Мақта саласын дамытуға арналған кешенді мемлекеттік қолдау егістен бастап қайта өңдеуге дейінгі бүкіл өндірістік циклды қамтиды. Тұқым, минералды тыңайтқыштар, пестицидтер және суару шығындарына субсидиялар қарастырылған.
Сурет: ашық ақпарат көзінен, Береке Сейітжаппардың фейсбук парақшасынан алынды.
