Бүгінгі таңда шикізат өңдеудің әлсіз дамыған бағыттарының бірі – тері мен жүнді өңдеу. Тері өңдеумен айналысатын 9 кәсіпорын жұмыс істейді, жүн өңдеу бойынша 13 кәсіпорын бар. 2023 жылы өндірілген 3,3 млн дана ірі қара терісінің тек 6%-ы өңделген. Бұл туралы ҚР АШМ Аграрлық азық-түлік нарықтары және ауыл шаруашылығы өнімін қайта өңдеу департаментінің директоры Назгүл Хатепова қатысқан ОКҚ брифингінде айтылды.
Тері мен жүн өңдеуді дамыту үшін әлемдік тәжірибені зерттеу жоспарлануда. Бүгінгі таңда Моңғолия осындай ел ретінде қарастырылып отыр. Осыған байланысты қазан айында Мемлекет басшысының Моңғолияға сапары аясында меморандумға қол қойылды. Бұл меморандум екі ел арасындағы тері мен жүнді қайта өңдеуді дамыту, кәсіпорын мамандарын даярлау жөніндегі ынтымақтастықты көздейді.
Ал, ет өңдейтін кәсіпорындар үшін негізгі проблемалар шикізаттың қымбаттығы және айналым қаражатының жетіспеушілігі. Ірі қара мен ұсақ мал басын ұлғайту және ет өңдейтін кәсіпорындарды қолжетімді шикізатпен қамтамасыз ету мақсатында 2021 жылдан бері тірі мал экспортына шектеу қойылған болатын.
Қазіргі таңда сүт өңдеудің дамуына тежегіш факторлар бар. Басты фактор елімізге импорттық тауарлардың көптеп келуі. Осы орайда Солтүстік Қазақстан облысының тәжірибесі негізінде өңірлердегі әлеуметтік-кәсіпкерлік корпорациялар арқылы тауарлы сүт фермалар желісін жылдық 2,5% мөлшерлемемен несиелеу жобасы жүзеге асырылуда.
Сурет: agrotrend.kz
