Агроөнеркәсіп кешеніндегі ерікті сақтандыру жүйесі аясында фермерлер Қазақстанның барлық аумағында жануарлары мен құстарын сақтандыра алады.
Қазіргі уақытта фермерлер үшін 80% мөлшерінде сақтандыру сыйақысының сомасын субсидиялау түрінде мемлекеттік қолдау бар. Фермерлер үшін ІҚМ, ұсақ мал, жылқы, шошқа және құстарды сақтандыру қолжетімді.
Шарт жасасудан бастап төлем алуға дейінгі барлық процесс Kezekte.kz платформасында онлайн режимде жүреді. Онлайн жүйемен жұмыс істеу үшін фермерлерде ЭЦҚ (электронды цифрлық қолтаңба) болуы қажет. Жануарлар мен құстарды жұқпалы, инвазиялық, жұқпалы емес және аса қауіпті аурулардан, өрттен, үшінші тұлғалардың қасақана әрекеттерінен, жазатайым оқиғалардан,қауіпті табиғи құбылыстардан, оның ішінде су тасқынынан сақтандыруға болады.
Жануарларды сақтандырудың негізгі шарты ауыл шаруашылығы жануарларын сәйкестендіру жүйесінде (АЖС) міндетті тіркеуде болуы тиіс. Жанауарларды сәйкестендіру жүйесінің базасында тіркелмеген жануарлар, жасы 2 айдан аспаған жануарлар және 40 күннен аспаған құстар, қолайсыз эпизоотиясы бар фермадағы жануарлар, яғни ауру өршіген немесе карантиндегі аумақ жануарлары сақтандыруға жатпайды.
Биыл 55 ауыл шаруашылығы тауарын өндіруші сақтандыру өнімдерін пайдаланды. Олар 11 мың бастан астам ірі қара, ұсақ мал, жылқы және 831 мыңнан астам құс сақтандырды. Сақтандыру компаниялары жазатайым оқиға салдарынан өлген 3 бас ірі қара үшін 296 мың теңге төледі.
Сурет: Agrotrend.kz
