«KAZAKH INVEST» ҰК Басқарма төрағасы Ержан Елекеев пен «Харвест Агро Холдинг» ЖШС директоры Дәулет Увашев Қазақстанда ауқымды агроиндустриялық кластер құру жөніндегі жобаны іске асыру туралы негіздемелік келісімге қол қойды. Жоба жер асты сулары мен заманауи су үнемдеу технологияларын пайдалана отырып, жайылымдық және шалғайдағы жерлерді суармалы ауыл шаруашылығы алқаптарына айналдыруды көздейді. Бұл туралы Ұлттық компанияның баспасөз қызметі хабарлады.
Жоба Жамбыл, Алматы, Жетісу, Түркістан, Павлодар, Қызылорда және Шығыс Қазақстан облыстарын қамтиды. Бірінші кезеңде инвестициялардың жалпы көлемі шамамен 500 млн доллар болатын 150 мың гектарды игеру және өңірлерде 1050 тұрақты жұмыс орнын құру жоспарлануда. Дайындалған жерлерде инвестор экспорттық және жем-шөп құндылығы жоғары ауыл шаруашылығы дақылдарын өсіруді жоспарлап отыр. Ең алдымен жүгері мен майбұршақ өсіруге басымдық берілмек.
Жобаның негізгі іс-шаралары – бұрғылау, гидрогеологиялық, геофизикалық және топографиялық-геодезиялық жұмыстарды атқару, инженерлік-геологиялық және агрохимиялық барлау жүргізу, суару және су алу жүйелерін жобалау және монтаждау, энергетикалық және инженерлік инфрақұрылымды жүргізу, жерді агроөнеркәсіпке даярлау және ауыл шаруашылығы өндірісін іске қосу.
«Харвест Агро Холдинг» ЖШС директоры Дәулет Увашев атап өткендей, жоба тұрақты аграрлық инфрақұрылымды қалыптастыруға бағытталған және 2030-жылға қарай суармалы жерлердің ауданын 2,5 млн гектарға дейін ұлғайту мақсатына қол жеткізуге үлес қосады.
Күтілетін нәтижелер 300 мың гектарға дейінгі суармалы жерлерді аграрлық айналымға тартуды, топырақ өнімділігін 4-6 есе арттыруды, жерасты көздері мен ылғал үнемдеу технологияларын қолдану есебінен су ресурстарын ұтымды пайдалануды, сондай-ақ ілеспе инвестицияларды ынталандыруды қамтиды.
Сурет: KAZAKH INVEST
