«ҚазАгроҚаржы» АҚ 2024-жылы іске қосылған ауыл шаруашылығы техникасын жылдық 5% мөлшерлемемен жеңілдетілген лизингке беру бағдарламасының шарттарына өзгерістер енгізілгенін хабарлады. Жаңа талаптарға сәйкес шаруалар алғашқы лизингтік төлемді 2025-жылдың 1-желтоқсанынан кешіктірмей төлеу мүмкіндігіне ие болады, – деп хабарлады компанияның баспасөз қызметі.
Қазақстандық ауыл шаруашылығы техникасын сатып алу үшін жеңілдетілген лизинг бағдарламасын іске асыруға биыл 200 млрд теңге бөлінді. Бұл компания тарихындағы бөлінген рекордтық қаржы. Қаржыландыру шарттары өзгеріссіз қалды: шаруалар ауыл шаруашылығы техникасын жылдық 5% мөлшерлемемен 7 жылға дейінгі мерзімге сатып ала алады, сондай-ақ алғашқы лизингтік төлемді 2025-жылдың 1-желтоқсанына дейін, яғни кейінге қалдыру мүмкіндігі қарастырылған.
«Қазақстанда көктемгі дала жұмыстары басталды және қазір шаруалар үшін басты міндет – егіс жұмыстарын уақтылы жүргізу. Алғашқы төлемді кейінге қалдыру оларға қаржылық жағдайын тұрақтандыруға және алғашқы жарнаны егін жинау аяқталғаннан кейінгі табыс есебінен өтеуге мүмкіндік береді», – деді «ҚазАгроҚаржы» АҚ Басқарма төрағасы Айдар Прашев.
Қазақстанда жеңілдетілген лизинг бағдарламасы алғаш рет 2024 жылы іске қосылып, өзінің тиімділігін дәлелдеді. Сол жылы оны жүзеге асыруға 120 млрд теңге бөлінді. Мемлекеттік қолдаудың арқасында 2800-ден астам шаруа 4300 ауыл шаруашылығы техникасын сатып алды.
Сурет: Agrotrend.kz
