Көксу ауданында жұмыс істеп тұрған кәсіпорындардың қуатын арттыру және жаңа жобаларды іске асыру есебінен ауыл шаруашылығы өнімдерін өңдеу үлесі артып келеді. Бұл туралы облыс әкімі Бейбіт Исабаевтың аудан тұрғындарымен кездесуінде айтылды, деп хабарлады Жетісу облысы әкімінің баспасөз қызметі.
Әкімнің айтуынша, Көксу қант зауытын қайта жаңғырту нәтижесінде оның қуаттылығы тәулігіне 5 мың тонна шикізат өңдеуге жеткізілмек. Сонымен қатар, жылына 15 мың тонна құс етін өндіретін «Beles Agro KZ» ЖШС-нің инвестициялық жобасы жүзеге асырылуда. Жобаның жалпы құны 14 млрд теңге.
Қазіргі таңда ауданда ауыл шаруашылығы өнімдерін өңдейтін үш ірі кәсіпорын тұрақты жұмыс істейді:
• Көксу қант зауыты – қант қызылшасын қабылдап, өңдеумен айналысады;
• «Уыз Май Индастри» ЖШС – майлы дақылдарды өңдейді (10,5 мың тонна майбұршақтың 2,2 мың тоннасын қайта өңдеген);
• «Көксу СМ» сүт зауыты («Арқабаев» ЖК) – жылына 12 мың тонна сүт өңдейді.
Бұдан бөлек, биыл ақпан айында тәулігіне 40 тонна сүт өнімін өндіретін «Green Horizon Enterprises» цехы іске қосылған.
«Біздің мақсатымыз – ауданда өндірілген өнімді өңдеу үлесін арттыру. Бұл бағытта жұмыстар жалғасады. Аудан әкімдігі тиісті басқармалармен бірлесіп, өңдеу саласына инвестиция тартуды күшейтуі қажет», — деді Бейбіт Исабаев.
Биылғы тоғыз айдың қорытындысы бойынша Көксу ауданының экономикасына 13,6 млрд теңге инвестиция тартылған.
Сурет: Жетісу облысы әкімдігі
