Көкшетауда агрономдар, сарапшылар және Қазақстан, Еуропа мен жақын шетелден келген зерттеушілерді жинаған «ТҰҚЫМ-2025» халықаралық конференциясы өтті, деп хабарлайды Ауыл шаруашылығы министрлігінің баспасөз қызметі.
Сапалы тұқымдар жоғары өнімділікті қамтамасыз ететін негізгі фактор. Өткен жылы Ақмола облысының ауыл шаруашылығы мамандары агрономиялық технологияларды қатаң сақтаудың, элиталық тұқымдардың егіс алқаптарын ұлғайтудың және мемлекеттік қолдау бағдарламаларын табысты іске асырудың арқасында өнім мол болды.
Тұқым сұрыптау бұл үдерісте маңызды рөл атқарады. А.И. Бараев атындағы астық шаруашылығы ғылыми-өндірістік орталығы ауыл шаруашылығы дақылдарының жаңа сорттарын шығарумен белсенді айналысады. Орталық ғалымдарының еңбегінің айқын нәтижесі ретінде «Таймас» жаздық жұмсақ бидай сортын атап өтуге болады. Өткен жылы бұл сорт Қазақстанның климаттық өзгерістеріне бейімделуімен және селекциядағы инновациялық жетістіктерімен ерекшеленіп, үлкен маңызға ие болды.
Конференция барысында ғалымдар мен мамандар тұқым сапасын арттыру, қазіргі заманғы селекциялық технологияларды енгізу, өңдеудің инновациялық әдістерін қолдану және өнімділікті арттыруға бағытталған сорттарды жетілдіру мәселелерін талқылады. Сондай-ақ шетелдік және отандық селекционерлер әзірлеген болашағы зор жаңа ауыл шаруашылығы дақылдарының сорттары туралы ақпарат ұсынылды.
Сурет: АШМ
