Бүгін «Бәйтерек» ұлттық басқарушы холдингінде оның еншілес ұйымы – «Аграрлық несие корпорациясы» АҚ жүзеге асыратын «Кең дала 2» бағдарламасы бойынша өтінім қабылдау басталғанына байланысты брифинг өтті, деп хабарлайды Agrotrend.kz.
Холдинг баспасөз қызметінің басшысы Перизат Шакенова журналистерге «Кең дала 2» бағдарламасының басымдықтарын түсіндірді.
«Бұл бағдарлама Аграрлық несие корпорациясы арқылы жүзеге асырылады және ауыл кәсіпкерлеріне қаржылық қолдау көрсетеді. Бағдарлама ағымдағы жылдың 1-қазанында іске қосылды. Айта кету керек, бұл өткен жылмен салыстырғанда бір ай бұрын басталып отыр. Мұндай шешім Мемлекет басшысы Қасым-Жомарт Тоқаевтың тапсырмасына сәйкес қабылданды. Басты мақсат – фермерлерге келер жылғы көктемгі дала жұмыстарына ертерек дайындалуға мүмкіндік беру. Яғни, олар қажетті қаржыны алдын ала алып, жұмысын уақытында бастай алады. Бұл – ауыл шаруашылығын дамытуға және еңбек өнімділігін арттыруға жасалған нақты қадамдардың бірі. Нақтырақ айтсақ, мұндай шара аграрийлерге күзде арзандатылған бағамен жанар-жағармай, тұқым мен тыңайтқышты сатып алуына және техникасын жөндеуіне жол ашады. Нәтижесінде, егіс жұмыстары сапалы жүргізіліп, өнім көлемі мен фермер табысы артады», — деді спикер.
Осы тұста айта кету керек, бағдарламаның қаржыландыру көлемі жыл сайын артып келеді. Егер 2023-жылы «Кең дала» бағдарламасына 140 млрд теңге бөлінсе, 2024-жылы бұл сома 321,5 млрд теңгеге жетті. Ал биылғы жылғы көктемгі егіс және күзгі жиын-терім жұмыстарына бөлінген қаржы 500 миллиард теңгеден асқан.
«Агроөнеркәсіп секторында жеңілдетілген қаржыландыруға деген сұраныс та артып келеді. Егер 2023-жылы «Кең дала» бағдарламасы бойынша шамамен 3,8 мың фермерге қолдау көрсетілсе, 2024-жылы бұл көрсеткіш 5 мыңнан асты. Ал биыл 8 мыңға жуық фермер жеңілдетілген қаржыландыру мүмкіндігін пайдаланды. Бұл – бағдарламаның тиімділігі мен қажеттілігінің айқын дәлелі», — деп атап өтті Перизат Шакенова.
Брифингте «Кең дала 2» бағдарламасының шарттары өте қолжетімді екені де айтылды.
Біріншіден, пайыздық мөлшерлемесі 5%. Бұл нарықтағы жағдаймен салыстырғанда өте тиімді.
Екіншіден, егер фермердің кепілдік мүлкі жеткіліксіз болса, бағдарлама бойынша «Бәйтерек» холдингінің еншілес ұйымы – «Даму» кәсіпкерлікті дамыту қоры арқылы несие сомасының 85%-на дейін кепілдік алуға болады. Бұл ретте фермер «Даму» қорына жеке жүгінбей-ақ, кепілдікті тікелей Аграрлық несие корпорациясының филиалынан рәсімдей алады.
Үшіншіден, алдыңғы жылдары несиелер қысқа мерзімге беріліп, 1-ші желтоқсанға дейін жабылуы керек болатын. Қазір қаржыландыру орта мерзімге жоспарлануда. Яғни, несиені қайтару мерзімі ұлғайтылды. Атап айтқанда, алынған несиенің 50%-ын 1-желтоқсанға дейін, ал қалған 50%-ын келесі жылдың 1 наурызына дейін өтеуге болады.
«Мысалы, фермер 2025 жылғы қарашада 2026 жылдың көктемгі егіс жұмыстарына қаржы алды дейік. Бұл жағдайда несие сомасының бірінші жартысын 2026 жылдың 1-желтоқсанына дейін, ал қалған бөлігін 2027-жылдың 1-наурызына дейін өтеуі тиіс. Бұл – фермерлер үшін өте тиімді мүмкіндік. Өйткені олар өз өнімін жақсы бағаға сатқаннан кейін ғана алған несиені қайтара алады», — деп түсіндірді спикер.
Несиені Аграрлық несие корпорациясының өңірлік филиалдарынан, несие серіктестіктерінен, екінші деңгейлі банктерден, әлеуметтік-кәсіпкерлік корпорациялардан, өңірлік инвестициялық орталықтардан және микроқаржы ұйымдары.
Мұндай қаржыландыру тетігінің әртүрлі болуы – ауыл шаруашылығы өнімін өндірушілерге еліміздің барлық өңірлерінде жедел қолдау көрсетуге мүмкіндік береді. Қажет болған жағдайда, фермерлер жергілікті жерлерде әдістемелік және кеңестік көмек ала алады.
Сондай-ақ, өтінімді Agronesie.kz порталы арқылы онлайн режимде немесе Agrocredit мобильді қосымшасы арқылы беруге болады. Өтінім Аграрлық несие корпорациясының бекітілген маманы арқылы қаралады. Құжаттар алдын ала қаралған соң, клиент корпорацияның филиалына шақырылып, келісімшарттқа қол қою жұмыстары жүргізіледі.
Толық ақпаратты Agrocredit.kz сайтында және Call-орталықтың 5353 нөмірі арқылы алуға болады.
Сурет: «Бәйтерек» холдингі
