Түркістан облысының Келес ауданында 51 гектар аумақта жылына 25 мың тоннаға дейін қызанақ өндіруге арналған «Ecoculture-Eurasia» өнеркәсіптік жылыжай кешенінің құрылысы жүріп жатыр, деп хабарлады Ауыл шаруашылығы министрлігінің баспасөз қызметі.
“Жобаның инвестициялық көлемі 42 млрд теңге. Қазіргі уақытта 40 гектарда жылыжай блоктарының металл құрылымдары орнатылып, ішкі және сыртқы желілер жүргізілді, қазандық және қосалқы отын қоймасы салынды. Сегіз жылыжай блогының төртеуі қазірдің өзінде іске қосылған. Сонымен қатар әкімшілік-тұрмыстық кешен және қоймалар құрылысы жүргізілуде”, — делінген министрлік таратқан ақпаратта.
«Ecoculture-Eurasia» серіктестігінің негізін қалаушы Алмас Дәуітовтің айтуынша, жобаны толық іске қосқаннан кейін 800 жаңа жұмыс орны ашылады, кешен заманауи нидерландтық жабдықтармен қамтамасыз етіледі, ал жылыжайлардың аумағы кезең-кезеңімен 500 гектарға дейін ұлғайтылады.
Кешенді іске қосу 2027-жылдың көктеміне жоспарланған.
2025-жылы Түркістан облысындағы жылыжайлардың жалпы ауданы 75 гектарға өсіп, 1715 гектарға жеткен.
Сурет: АШМ
