Қостанай облысында өткен «Jańa Dala / Qarqyn ‘2025» халықаралық ауыл шаруашылығы көрмесіне Қазақстан Республикасындағы Молдова Республикасының Төтенше және Өкілетті Елшісі Штефан Горда құрметті қонақ ретінде қатысты. Ол Қазақстанның ауыл шаруашылығы саласының әлеуетіне жоғары баға беріп, екі ел агробизнесі арасында ынтымақтастық мүмкіндіктер мол екенін айтты.
«Біз өзара нарықтарға өнім жеткізу мүмкіндіктерін кеңейтуге және тиімді логистикалық дәліздер құруға бар күшімізді саламыз. Сондай-ақ органикалық ауыл шаруашылығы мен климаттың өзгеруіне бейімделген өсімдік сорттарын шығару саласындағы жобаларды іске асыруға жәрдемдесуге ниеттіміз. Сонымен қатар, Молдованың жоғары сапалы ауыл шаруашылығы өнімдерін Қазақстан нарығына жеткізу жағын арттыруға қызығушылық танытамыз және қазақстандық компанияларды Молдова агроөнеркәсіп кешеніне инвестиция салуға, одан әрі еуропалық нарыққа экспорт жасау мақсатында шақырамыз», – деді Штефан Горда.
Конференцияға Өзбекстан делегациясының өкілдері де қатысуда. Өзбекстанның аграрлық нарығы мен логистикасы жөніндегі сарапшысы Алишер Махмудовтың айтуынша, көрмеге келген кәсіпорындар мүшелігіне кіретін «Узегмойсаноат» қауымдастығы елдегі шамамен 320 май өңдеу кәсіпорнын біріктіреді. Бұл кәсіпорындар түрлі шикізаттан, ең алдымен мақта және күнбағыс тұқымынан өсімдік майын өндіреді.
«Жыл сайын өзбекстандық өңдеушілер 200 мың тоннадан астам шикізат пен жартылай фабрикаттар, сондай-ақ 150 мың тоннадан астам дайын қазақстандық май импорттайды. Біздің басты мақсатымыз – «Jańa Dala / Qarqyn ‘2025» көрмесі аясында қазақстандық серіктестердің жаңа маусымдағы мүмкіндіктерімен танысу, екіжақты ынтымақтастықтың келешегін талқылау және тікелей жеткізушілермен кездесіп, келісімшарттар жасасуға жағдай жасау», – деді өзбек делегациясының басшысы.
«Jańa Dala / Qarqyn ‘2025» Дала күні Қостанай облысы, Меңдіқара ауданы, Степановка ауылындағы «Восток-1» ЖШС және «Агрофирма Қарқын» ЖШС демонстрациялық алқаптарында өтіп жатыр. Іс-шара бүгін аяқталады.
Айта кетейік, халықаралық ауыл шаруашылығы көрмесін ұйымдастырушы – қазақстандық «EXPO TIME» компаниясы.
Сурет: Agrotrend.kz
