А.Бараев атындағы астық шаруашылығы ғылыми-зерттеу өндірістік орталығының ғалымдары 019 «Инновациялық тәжірибені тарату және енгізу жөніндегі қызметтер» бюджеттік бағдарламасын іске асыру аясында Ақмола облысының 6 шаруашылығының пилоттық учаскелерінде көктемгі егістік жұмыстарын аяқтады, деп хабарлады облыс әкімдігінің баспасөз қызметі.
Бағдарламаның мақсаты – Ақмола облысының табиғи-климаттық жағдайларына байланысты әр экологиялық-географиялық аймақты қамти отырып, өнімділікті 10-15%-ға арттыру. Сондай-ақ, егін егудің инновациялық технологияларын және ауыл шаруашылығы дақылдарының перспективалы сорттарын тиімді пайдалану. Ақмола облысының 6 шаруашылығында өсімдік шаруашылығы өнімінің орнықты өндірісін қарқындатуға бағытталған инновациялық тәжірибені тарату және енгізу.
Дәнді, майлы және бұршақ дақылдарын өсіруде инновациялық технологияларды қолдану өндірістік тәжірибесі жалпы ауданы 2 600 гектардан астам жерге жүргізілді. Егінді егуден жинауға дейінгі барлық кезең А. Бараев атындағы астық шаруашылығы ғылыми-зерттеу өндірістік орталығы ғалымдарының ғылыми сүйемелдеуімен іске асады. Кейін бұл іс-шара өңір фермерлерін оқытумен жалғасады.
Бұл бағдарлама Ақмола облысы әкімдігінің Ауыл шаруашылығы және жер қатынастары басқармасының қолдауымен жүзеге асырылып жатыр.
Сурет: облыс әкімдігі
