Голштин – сүтті сиыр тұқымы Канада мен АҚШ аумағында өсірілген. Голштин тұқымының арғы тегі Батыс Еуропа-Голландия, Германия, Бельгия мемлекеттерінің аумағында өсірілген қара және қара-шұбар сиырлар болды. Алғаш рет қара-шұбар сиырлар АҚШ-қа 19-ғасырда әкелінді. Осы сиырлардың алғашқы қорын сатып алған кәсіпкер Уинсроп Ченери олардың сүт өнімділігін жақсартты. Осы жұмыстың нәтижесінде 1871 жылы голштин-фриз мал өсірушілер қоғамы құрылды. 1983 жылы АҚШ пен Канадада сиыр тұқымының атауы өзгертіліп, голштин ғана қалды.
Сыртқы тұрқы денелі, орташа дамыған бұлшық еттері бар, кеудесі терең және кең, буындары күшті, ұзын тұяқтарымен сипатталады. Алғаш төлдеген сиырлардың тірі салмағы 650 кг, жасамалыларының салмағы орта есеппен 750 кг. Бұқаларының тірі салмағы 1200 кг-ға жетеді. Алғаш төлдеген сиырлардың шоқтығының биіктігі 137 см-ге жетеді, ал толық жастағы сиырларда 143-145 см аралығында болады, Еркек бұзауларының тірі салмағы 40-42 кг, ал ұрғашы бұзауларының салмағы 37-39 кг болады. Күніне 35 литрге дейін сүт береді. Қазіргі уақытта Қазақстанның ірі тауарлы сүт фермалары осы сиыр тұқымын сауып отыр.
