Астанада XII халықаралық гүл шаруашылығы мен көгалдандыру көрмесі Flora Expo Astana 2025 және өсімдіктерді өсіруге арналған жабдықтар мен технологиялардың халықаралық көрмесі Grow Expo Astana 2025 өз жұмысын бастады, деп хабарлады Ауыл шаруашылығы министрлігінің баспасөз қызметі.
Көрменің ашылу рәсіміне Қазақстан Республикасы Ауыл шаруашылығы вице-министрі Азат Сұлтанов пен Нидерланд Корольдігінің Ауыл шаруашылығы, балық шаруашылығы, азық-түлік қауіпсіздігі және табиғатты қорғау министрлігінің Бас хатшысы Ян-Кейс Худ қатысты.
Көрмеге әлемнің 20 елінен — Бельгия, Германия, Израиль, Италия, Қытай, Нидерланд, АҚШ, Франция, Швейцария, Оңтүстік Корея, Жапония және басқа да мемлекеттерден келген 200-ден астам компания қатысты. Бұл Қазақстанның гүл шаруашылығы, көгалдандыру және агротехнология саласындағы Орталық Азиядағы жетекші іскерлік хаб ретіндегі мәртебесін тағы да растайды.
Көрмеде Нидерланд павильонына ерекше назар аударылды. Онда 40-тан астам компания өздерінің заманауи технологияларын, озық әзірлемелері мен жаңа сұрыптарын ұсынуда.
Көрменің мазмұнды іскерлік бағдарламасы гүл және бақ бизнесінің дамуы, жылыжай саласы, көшет нарығы, қоғамдық кеңістіктерді абаттандыру мен көгалдандыру, флористика және халықаралық ынтымақтастық тақырыптарына арналған 25-тен астам іс-шараны қамтиды.
Атап айтқанда, 8–10 сәуір аралығында «Нидерланд күні» II форумы, Jasyl Astana – 2025 атты қоғамдық кеңістіктерді көгалдандыру және абаттандыру жөніндегі халықаралық тәжірибелік конференция, жылыжай бизнесіне арналған іскерлік кездесу, сондай-ақ «Азия Түсі – 2025» атты қазақстандық флористика байқауы өтеді.
Көрме қонақтары гүл шаруашылығы, өсімдік шаруашылығы және агротехнология салаларында сенімді серіктестер тауып, нарықтың өзекті талдауын алып, әлеуетті клиенттермен, жеткізушілермен және әріптестермен байланыс орнатып, кәсіби біліктіліктерін арттырады, тәжірибе алмасу мүмкіндігіне ие болады.
Сурет: АШМ
