Ауыл шаруашылығы министрі Айдарбек Сапаров Азық-түлік корпорациясы арқылы шаруалардан астықты тікелей сатып алу жоспарына түсінік берді, деп хабарлайды ҚазАқпарат.
«Бұл тұрғыда Мемлекет басшысы тапсырма берді. Ертең Үкімет отырысында Азық-түлік корпорациясы арқылы фермерлерден тікелей астық сатып алу тақырыбын талқылаймыз. Бастапқы 10 млрд теңгені бөлуді Қаржы министрлігі дайындап жатыр. Осы қаражатқа сатып алуды бастай береміз. Ары қарай тағы қосымша қаражат бөлінеді», — деді А. Сапаров Парламент Мәжілісінде биылғы астықты өткізу мәселесін талқылауға арналған жиыннан кейін тілшілер сұрағына жауап бере отырып.
Оның айтуынша, Азық-түлік корпорациясындағы жинақталған бидай сатылғаннан кейін, осы босаған қаражат та фермерлерді қолдауға бағытталады.
Сурет: agrotrend.kz
