Қазақстанда 2024-жылы 1088 астық жинайтын комбайн өндірілді, бұл өткен жылмен салыстырғанда 3,2%-ға артық. Сондай-ақ, ауыл шаруашылығы техникасының басқа да түрлерінің өндірісі өскен. Бұл туралы Ұлттық статистика бюросының баспасөз қызметі хабарлады.
Атап айтқанда, қазақстандық өндірушілер 6 421 трактор шығарды, бұл өткен жылдың сәйкес кезеңімен (5 402 трактор) салыстырғанда 18,9%-ға жоғары.
Жалпы, Қазақстанда машина жасау 9,7%-ға артты. 2024-жылы елде осы салада 320 кәсіпорын жұмыс істеді.
Естеріңізге сала кетейік, QazIndustry орталығының ақпараты бойынша, 2024-жылы Қазақстанда жалпы құны 5,7 млрд теңге болатын ауыл шаруашылығы машина жасау секторында үш жаңа өндіріс іске қосылды. Кәсіпорындар өздігінен жүретін ауыл шаруашылығы машиналарын, тіркеме және аспалы техниканы, жаңбырлатып суару жабдықтарын, терең қопсытқыштарды және басқа да техникаларды шығарады.
Жалпы құны 18,4 млрд теңгеге болатын бес жобас іке асыру сатысында тұр. Комбайндар, тракторлар, ауыр тырмалар, астық тасығыштар және т.б. өндіру жоспарлануда. Шығарылатын өнімнің көп бөлігі ішкі нарыққа бағытталады.
Сурет: Agrotrend.kz
