Солтүстік Қазақстан облысында ауыл шаруашылығы министрі Айдарбек Сапаровтың қатысуымен көктемгі дала жұмыстарына дайындық мәселелері бойынша семинар-кеңес өтті, деп хабарлады министрліктің баспасөз қызметі.
Іс-шараға облыс әкімі Ғауез Нұрмұхамбетов, Қазақстанның аграрлық кеңесінің, қаржы институттарының өкілдері, ғалымдар, өңірдегі агрохолдингтер мен ауыл шаруашылығы кәсіпорындарының басшылары, барлығы 500-ден астам адам қатысты.
«Біз сіздермен егін егуге дайындықтың жауапты кезеңінде кездесіп отырмыз. Өткен жылы жиналған рекордтық өнім Қазақстанның аграрлық секторына экономиканың басқа салалары арасында көшбасшылық позицияны қамтамасыз етті. Ауыл шаруашылығының нақты көлем индексі 113,7% құрады. 6,5 млн тонна бидай жинаған Солтүстік Қазақстан облысының шаруаларының үлесін атап өту өте маңызды-бұл астық егетін өңірлер арасында ең жақсы нәтиже», — деді министр.
Сонымен қатар, ауыл шаруашылығы өндірушілерін мемлекеттік қолдау фермерлердің табысты жұмысының маңызды факторы екенін атап өтті.
Жеңілдетілген несиелеу негізгі құралдардың бірі болып қала береді, сонымен қатар ерте қаржыландыруға өтінімдерді қабылдау 2024-жылдың қарашасында басталды.
Биыл көктемгі егіс және егін жинау жұмыстарын қаржыландыру көлемі жалпы 900 млрд теңгеге дейін жеткізіледі, оның 200 млрд теңгесі ауыл шаруашылығы техникасының жеңілдетілген лизингіне беріледі.
Көктемгі егіс жұмыстары үшін алатын қарыз сомасының 85%-на кепілдік беру жалғасады.
Минералды тыңайтқыштарды субсидиялауға Үкімет резервінен 48,4 млрд теңге қарастырылған.
Айдарбек Сапаров сондай-ақ мал шаруашылығы мен қайта өңдеуді қолдау мақсатында қабылданып жатқан шаралар туралы айтып берді.
2024 жылы қайта өңдеуге 35 млрд теңге көлемінде айналым қаражатын жеңілдікпен қаржыландыру іске қосылды, биыл осы мақсаттарға 48 млрд теңге бөлу жоспарлануда. Министрлік бордақылау алаңдары мен құс фабрикалары үшін қысқа мерзімді кредиттік ресурстарды тарту, СҚО тәжірибесі шеңберінде қаржыландыру бағдарламасын іске асыру бойынша белсенді жұмыс істеуде.
«Мемлекет фермерге барлық жағдай жасады және одан нақты әртараптандыруды, өнімділік пен өндірілетін өнімнің сапасын арттыруды күтуде», — деп түйіндеді министр.
Кеңесте облыстың алдағы көктемгі егіс жұмыстарына дайындық барысы талқыланды, заманауи агротехнологиялар мен көктемгі егіс науқанын жүргізу әдістері бойынша сараптамалық ұсынымдар айтылды.
Өңірде 4,4 млн га ауыл шаруашылығы дақылдарын егу жоспарлануда, оның 760 мың гектарына майлы дақылдар егіледі. Ерте қаржыландырудың арқасында фермерлер тұқым, тыңайтқыш, дизель отынын сатып алды, техникаларын жөндеді. Бір сөзбен айтқанда егін егу науқанына ерте дайындалды.
Жеңілдетілген лизинг аясында жалпы сомасы 87 млрд теңге болатын 3 мың жаңа техника сатып алу жоспарлануда.
Сурет: АШМ
