Еділбай тұқымды қой етінің өнімділігі жоғары екені ғылыми тұрғыда дәлелденгені туралы жаңа деректер алынды, деп хабарлады Ауыл шаруашылығы министрлігінің баспасөз қызметі. Көпжылдық зерттеулердің нәтижелері еділбай қойларында жұмсақ ет бөлігінің шығымы 81%-ға жететінін көрсеткен.
Жетісу облысы Алакөл ауданына қарасты «Алакөл-Агро» серіктестігі базасында «ҰАҒБО» КЕАҚ-тың еншілес ұйымы Қазақ мал шаруашылығы және жем-шөп өндірісі ғылыми-зерттеу институтының ғалымдары шаруашылық мамандарымен бірлесіп зерттеу жүргізді.
Зерттеу аясында отандық және шетелдік тұқымдарға жататын қошқарларды асыл тұқымды және өндірістік саулықтармен будандастыру сызбалары зерттелді. Ет өнімділігін нақты бағалау мақсатында бордақылау мен жайып семіртудің түрлі кезеңдерінде еркек тоқтыларға бақылау сойымдары жүргізіліп, ұшалары бөлшектелді.
Әртүрлі генотипке жататын жас қойларға жүргізілген бақылау сойымдары саладағы жетекші сарапшылардың қатысуымен өтті.
Бақылау нәтижелері бойынша еттің жұмсақ бөлігінің жалпы шығымы тұқымдық ерекшелігіне, генотипіне және малдың қоңдылық деңгейіне байланысты 71–81% аралығында болғаны анықталды. Ең жоғары көрсеткіш еділбай тұқымды қойларға тиесілі, яғни, құйрық майын қоса есептегенде 81% болды. Сондай-ақ, осыған ұқсас жағдай (80%-ға дейін) қазақтың қылшық жүнді құйрықты қойларының аққарабас ішкі тұқымдық түріне жататын малдарда тіркелді.
Ет және жүн-ет бағытындағы будан қойлар — дорпер × оңтүстік қазақстандық меринос және тексель × қазақтың биязы жүнді қойы — еттің жұмсақ бөлігінің шығымын 75–77% деңгейінде болды.
Зерттеу нәтижелері құйрық майының жеуге жарамды өнім көлемін көбейтіп, ұшаның қоректік құндылығын арттыратынын растады.
Ғалымдардың айтуынша азықтандыру мен күтіп-бағудың оңтайлы жағдайларында құйрықты қой тұқымдары өнімнің жиынтық шығымы бойынша шетелдік мамандандырылған ет бағытындағы кейбір тұқымдардың будандарынан да асып түсуі мүмкін.
Зерттеулердің ғылыми және тәжірибелік маңызы жоғары және оларды Қазақстанда етті қой шаруашылығын дамытуға бағытталған мемлекеттік саясат пен бағдарламаларды қалыптастыру кезінде пайдалануға болады.
Сурет: Agrotrend.kz
