ҚР Ауыл шаруашылығы вице-министрі Азат Сұлтанов бастаған қазақстандық делегация Gulfood 2025 көрмесіне қатысып жатыр, деп хабарлады министрліктің баспасөз қызметі.
Делегация мүшелері Таяу Шығыс және Солтүстік Африка елдерінен өсімдік шаруашылығы өнімдерін әлеуетті сатып алушылармен бірқатар кездесулер өткізді, сондай-ақ дистрибьюторлармен, бөлшек сауда кәсіпкерлерімен және трейдерлермен келіссөздер жүргізді.
Серіктестер тарапынан қызығушылық жоғары. Олар Қазақстан өнімдерінің сапасына және сапаны одан да жоғары деңгейде жақсартуға әлеуетіміздің зор екеніне көз жеткізді.
Айта кетейік, нарықтарды кеңейту мәселесі ҚР Ауыл шаруашылығы министрлігі үшін басым мәселелердің бірі. Мемлекет басшысының дәстүрлі өткізу нарықтарын сақтау, экспортты әртараптандыру және түрлі елдердің талаптарына бейімделген жеткізудің икемді схемаларын құру жөніндегі тапсырмасы аясында барлық қажетті шаралар қабылдануда.
Gulfood 129 елден 5,5 мыңнан астам компания және әлемнің 185 елінен 130 мыңнан астам өкіл қатысатын маңызды халықаралық платформа. Олардың қатарында Таяу Шығыс, Солтүстік Африка, бірқатар Азия елдері, Еуропаның өндірушілері мен сатып алушылары бар.
2026-жылы қазақстандық өндірушілер 26-30 қаңтар аралығында Дубайдың Дүниежүзілік сауда орталығында (DWTC) және Expo City-дегі Дубайдың жаңа Көрме орталығында (DEC) өтетін Gulfood көрмесіне қатысады.
Сурет: АШМ
