Қарағанды облысының Бұқар жырау ауданында биылғы көктемгі егіс науқанына 300-ден аса ауыл шаруашылық құрылымдары қатысады, деп хабарлады аудан әкімдігінің баспасөз қызметі. Олар бұл жолы 146 мың гектар алқапқа (бидай 99 га, арпа 44,5 мың га, сұлы 2,5 мың га.) дәнді дақылдар тұқымын себуді жоспарлап отыр. Ал майлы дақылдар тұқымын 8 мың гектарға екпек. Сондай-ақ 200 гектарға көкөніс, 2500 гектарға картоп, 44 мың гектарға мал азығы тұқымы егіледі.
Қазіргі уақытта 17 900 тонна дәнді дақылдар мен 7 мың тонна картоп тұқымы дайындалған. Соған қосымша өнім сапасын арттыру үшін еліміз бен Ресейдің тұқым шаруашылықтарынан 300 тоннадан астам астық және 200 тонна картоп тұқымын сатып алу көзделуде.
«Өткен жылы аудан шаруашылықтары өздерінің техникалық парктерін жаңартып, 48 трактор, 5 егін егу кешені мен 12 дәнсепкіш, 135-тен астам түрлі жабдықтар сатып алған. Биыл қолда бар техникадан бұл науқанға 1240 трактор, 900 дәнсепкіш пен 21 егін егу кешені пайдаланылады. Қазір тракторлардың 88 және дәнсепкіштердің 91,6 пайызы жөнделіп, даярлық сапына қойылды», — дейді аудандық ауыл шаруашылығы бөлімінің басшысы Манат Құрманғалиев.
Биыл көктемгі дала жұмыстарын атқаруға қажет 2756 тонна дизель отынына электрондық тапсырыс жасалса, «Кең дала 2» бағдарламасы бойынша несие қаражатын алуға да өтінімдер берілген.
Сурет: Agrotrend.kz
