Батыс Қазақстан облысында Шыңғырлау ауданының прокуратурасы субсидия беру кезінде заңдылықтың сақталуын талдау нәтижелері бойынша 20 млн астам теңге көлемінде бюджет қаражатын теріс пайдалану фактілерін анықтады, деп хабарлады ҚазАқпарат агенттігі.
БҚО прокуратурасының баспасөз қызметінен мәлім еткеніндей, мысалы, 2021 жылы 25 желтоқсанда шаруа қожалығы 442 асыл тұқымды қой сатып алуға өтініш беріп, 6 млн 630 мың теңге көлемінде субсидия алған. Талдау барысында бір жылдың ішінде ауыл шаруашылығы жануарларын бірдейлендіру жөніндегі дерекқордан аталған малдың есептен шығарылғаны белгілі болды.
Прокуратура мәліметіне сәйкес, Ауыл шаруашылығы министрінің 2019 жылғы 15 наурыздағы бұйрығымен бекітілген асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялау қағидаларын бекіту туралы ережеге сәйкес мал басының жыл бойы сақталуын (мал шығынының зоотехникалық нормасын қоспағанда) қамтамасыз ету міндеттелген. Осы талаптың бұзылуы салдарынан мемлекетке 6 млн 630 мың теңге материалдық шығын келтірілді.
«Заңды бұзу фактілері бойынша құзыретті органға тиісті қадағалау актісі енгізілді. Күні бүгінге дейін прокуратураның ұсынуы бойынша мемлекетке 14,7 миллион теңге қайтарылды. Қалған соманы өндіру атқарушылық іс жүргізу тәртібінде жүргізілуде», — деп хабарлады ведомстводан.
Cурет: agrotrend.kz
