Қазақстанда ауыл шаруашылығы – ел экономикасының маңызды секторларының бірі. Өңірлік коммуникациялар қызметінің ақпараттық алаңында өткен баспасөз мәслихатында облыстық Ауыл шаруашылығы басқармасының басшысы Жасұлан Халиуллин 2024-жылы атқарылған жұмыстар мен 2025-жылға қойылған міндеттер туралы баяндады, деп хабарлады облыс әкімдігінің баспасөз қызметі.
«Ауыл шаруашылығы – ел экономикасының негізгі драйверлерінің бірі. 2024- жылы бұл саланы дамытуға 45,7 млрд теңге бөлініп, оның ішінде 31,7 млрд теңге субсидия және 32,6 млрд теңге несие ретінде шаруаларға қолдау көрсетілді. Өсімдік шаруашылығында 100 млрд теңгенің, ал мал шаруашылығында 181 млрд теңгенің өнімі өндірілді. Жалпы, ауыл шаруашылығының өнім көлемі 281 млрд теңгені құрады», — деді басқарма басшысы.
Саланы дамыту мақсатында тыңайтқыштардың құны 60%-ға субсидияланды, ал су үнемдеу технологиялары енгізілген жер көлемі 9 340 гектарға жетті. Мал шаруашылығында 230 мың бас ірі қара тұқымдық түрлендіруге қатысты.
2025-жылы аймақта егістік алқаптарын 613 мың гектарға жеткізу, мал басын 1,213 млн басқа дейін арттыру, 12 ірі инвестициялық жобаны іске асыру жоспарланып отыр. Мемлекет тарапынан көрсетілген қолдау ауыл шаруашылығының тұрақты дамуын қамтамасыз етіп, салаға жаңа технологияларды енгізуге мүмкіндік бермек.
