Абай облысының әкімі Берік Уәли жұмыс сапарымен Бородулиха ауданына барып, «Лазарев и К» шаруашылығының егіс алқаптарын аралап, көктемгі дала жұмыстарымен танысты, деп хабарлады аймақ әкімдігінің баспасөз қызметі.
«Лазарев и К» жауапкершілігі шектеулі серіктестігі өсімдік және мал шаруашылығын қатар дамытып келеді. Иелігінде 13 мың гектардан астам ауыл шаруашылығы жері бар. Оның 10 мың гектарға жуығына биыл егін егіледі. Серіктестік майлы дақылдарды терең өңдеуге ден қойып отыр. Күнбағыс майын Қытайға экспорттайды.
Биыл шаруашылықта 4 мың гектарға күнбағыс, 600 гектарға зығыр және рапс егіп жатыр. Серіктестік өнім сапасын арттыру үшін заманауи технологияларды қолданады. Рапсты дронмен себу тәсілі сынақ ретінде іске асырылған. Келер жылы сәуір айында ылғал толық кетпей тұрып, осы әдіспен рапс егу көзделіп отыр. Ұсақ дәнді дақылдарды егуге арналған арнайы техника да сатып алынған.
Сонымен қатар сүтті терең өңдеуді дамыту мақсатында шаруашылық 420 сауынды сиыр сатып алған. Қазіргі таңда мұнда 1 500 бас ірі қара бар. 100 адам тұрақты жұмыспен қамтылған. Тұқымдық өңдеу мен органикалық тыңайтқыш енгізу жүйесі жолға қойылған. Қытай мамандарымен бірлесіп, күнбағыс буданын алу жұмысы жүргізіліп жатыр.
Облыс әкімі шаруашылықтың жұмыс процесімен танысып, заманауи үлгідегі «К 700» тракторымен егіс алқабын аралап көрді.
Айта кетейік, биыл Бородулиха ауданында 320 мың гектарға егін егу жоспарланып отыр.
