Солтүстік Қазақстан облысының әкімі Ғауез Нұрмұхамбетов Үкімет отырысында көктемгі егін егу жұмыстарының барысы туралы баяндады.
Аймақ басшысы атап өткендей, биыл ауданы 4,4 млн гектарға ауыл шаруашылығы дақылы себіледі. Оның ішінде астық – 3,3 млн га, майлы дақылдар – 760 мың га, мал азықтық – 392 мың га, картоп – 6,5 мың га, көкөніс – 1,3 мың га. Әртараптандыру аясында майлы дақыл алқабы 85 мың гектарға ұлғайтылады.
Бүгінгі күні 274,5 мың тонна тыңайтқышқа немесе жоспардың 82,3%-на келісімшарт жасалды, 470 мың тонна кондициялық тұқым бар, 52,6 мың тонна элиталық тұқым сатып алынды. Сортты жаңарту 11,2%. 254 теңге/литрден 52,2 мың тонна жеңілдетілген дизель отыны бөлінді.
«12,3 мың бірлік техника жұмылдырылады, олар 100% дайын. Ерте қаржыландырудың арқасында диқандар егін егуге алдын ала дайындалды. Фермерлер «Кең Дала 1» және «Кең Дала 2» бағдарламалары бойынша 70 млрд теңге қаржы алды. Өткен жылғы қарыздар бойынша берешек жоқ. «ҚазАгроҚаржы» АҚ арқылы 11,2 млрд теңге қаржыландырылды, форвардтық сатып алуға 7,4 млрд теңге бөлінді», — деп атап өтті Солтүстік Қазақстан облысының әкімі.
Сондай-ақ ол биылғы көктем бұршақ пен майлы дақылдарды ерте себуге қолайлы болғанын айтты. Егін егу жұмыстары сәуірдің соңында басталды, бұл оңтайлы агротехникалық мерзімге сәйкес келеді.
Сурет: АШМ
