Премьер-министр Олжас Бектеновтің төрағалығымен өткен Үкімет отырысында көктемгі дала жұмыстарына дайындық мәселелері қаралды. Қазіргі жағдай туралы Ауыл шаруашылығы министрі Айдарбек Сапаров, сондай-ақ бірқатар өңір әкімдері баяндады.
«Биыл 23,8 млн гектар алқапқа ауыл шаруашылығы дақылдарын егу жоспарлануда. Бұл өткен жылмен салыстырғанда 518 мың гектарға артық. Биыл егіншілік саласын қаржыландыру көлемі 700 млрд теңгеге дейін ұлғайтылды. Лизингке жұмсалатын қаржы 200 млрд теңгеге жеткізілді», — деп атап өтті министр.
Үкімет отрысының қорытындысы бойынша өткен баспасөз конференциясына Ауыл шаруашылығы министрлігінің өкілдері мен «Аграрлық несие корпорациясы» АҚ Басқарма төрағасы Алмат Әшірбеков қатысып, журналистердің сұрағына жауап берді.
Айта кетейік, Аграрлық несие корпорациясы «Кең дала 2» бағдарламасы бойынша көктемгі егін егу мен күзгі жиын терім жұмыстарын қаржыландыруды ерте бастады. Қазіргі уақытта жалпы сомасы шамамен 222 млрд теңге болатын 1500-ден астам фермерден түскен өтінім пулы жасақталды. Оның ішіндегі сомасы 211 млрд теңгеден асатын 1405 фермердің өтінімі бойынша жұмыс жүргізілуде. Ал 1065 клиентке 142 млрд теңгеден астам қаржы берілді.
Сурет: Agrotrend.kz
