Ауыл шаруашылығы министрі Айдарбек Сапаровтың төрағалығымен өткен кеңейтілген алқа отырысында мал шаруашылығы мен ветеринариялық инфрақұрылымды дамытудың, жануарлардан алынатын өнімдердің экспорттық әлеуетін арттырудың негізгі мәселелері талқыланды, деп хабарлайды министрліктің баспасөз қызметі.
«Биыл ауыл шаруашылығы жануарларының өнімділігін арттыруға және мал шаруашылығы өнімдерінің экспортын ұлғайтуға бағытталған шаралар кешені іске асырылатын болады. Осы мақсаттарға жетудің маңызды шарты ветеринариялық инфрақұрылымды дамыту. Ветеринариялық нысандарды салу жөніндегі индикативтік жоспарлардың орындалуы алаңдатады», — деп атап өтті министр өңірлердің осы бағыттағы жұмысына наразылығын білдіріп.
Вице-министр Аманғали Бердалин мал шаруашылығының дамуы туралы баяндады. Мал шаруашылығының жалпы өнімін өндіру көлемі 3,6% өсіммен 3,3 трлн теңгені құрады. 4,3% өсіммен барлық түрдегі 1,2 млн тонна ет, 4,4% өсіммен 3,6 млн тонна сүт өндірілді. Өндірілетін өнім көлемі ішкі қажеттілікті толық қамтамасыз етуге, сондай-ақ экспорт көлемін ұлғайтуға мүмкіндік береді. Мәселен, 22,1 мың тоннадан астам сиыр еті (өсімі 1,5 есе), 17,6 мың тонна қой еті (өсімі — 2,2 есе) экспортталды.
Мемлекет басшысының тапсырмасы бойынша ауыл шаруашылығының жалпы өнімін 2 есеге ұлғайту бойынша 2023-2024 жылдары 86 тауарлы сүт фермасының құрылысы қаржыландырылып, оның 39-ы пайдалануға берілді, 47 жобаны іске асыру жалғасуда. 2025-жылы өңірлерде өндіріс көлемі 139,5 мың тонна болатын кемінде 31 тауарлы сүт фермасын 2026-2027 жылдары іске қосу жоспарланған.
Құс фабрикаларын салу және етті мал шаруашылығында австралиялық тәжірибені енгізу жұмыстары жалғасуда. 2024 жылы қуаттылығы жылына 15,9 мың тонна ет бағытындағы 6 құс фабрикасы іске қосылды. Ақтөбе, Алматы, Атырау облыстарының әкімдіктері жобаларды іске қоспаған.
2025-жылға арналған австралиялық тәжірибені енгізу жұмысы аясында 10 жоба айқындалды. Алдағы екі жылда 98 мың басқа арналған 6 бордақылау алаңын, 50 мың бас ұсақ малға арналған ірі бордақылау кешенін және бірінші мамандандырылған мал биржасын салу жоспарлануда. Осыған байланысты жем-шөп өндірісінің жол картасы өзектендірілді.
Ветеринариялық қадағалау саласындағы жұмыстың қорытындысы баяндалды. Соңғы үш жылда ауру ошақтарының 49,1%-ға төмендеуі байқалды. Өңірлерде 223 ветеринариялық нысан салынды. Алайда, жеті облыста бірде-бір ветеринарлық пункт салынбаған. 2025-жылы 546 жаңа нысан салу және 20 инсенератор сатып алу жоспарланып отыр.
Сурет: Agrotrend.kz
