Абай облысының әкімі Берік Уәли Ақсуат ауданының Сәтбаев ауылындағы «Алтын-Алтай» шаруа қожалығының жұмысымен танысты, деп хабарлады аймақ әкімдігінің баспасөз қызметі. Шаруа қожалығының негізгі бағыты – суармалы егіншілік пен мал шаруашылығы. Жалпы ауыл шаруашылығына арналған жер көлемі 1500 гектар. Қазіргі уақытта шаруашылықта 130 бас мал бар. Онға жуық адам тұрақты жұмыспен қамтылған.
Шаруашылықта 1000 гектар жерге тамшылатып суару жүйесін енгізу жобасы жүзеге асырылуда. Биыл оның алғашқы кезеңінде 300 гектар алқапқа күнбағыс егілді. Жоба толық іске қосылғанда 500 гектарға майлы дақылдар, 150 гектарға картоп, 150 гектарға көкөніс және 200 гектарға жүгері егіліп, жалпы өнім көлемі 10 мың тоннадан асады деп жоспарланып отыр.
Шаруа қожалығының жетекшісі Тынай Қуанған жобаны толық деңгейде жүзеге асыруға электр желісінің жеткіліксіздігі кедергі болып тұрғанын айтты. «Электр желісін тарту құрылысы» атты инвестициялық жобаны әзірлеп, Экономика және бюджеттік жоспарлау басқармасына өтінім жолданған.
Күнбағыс алқабын аралап, шаруашылықтың жұмысымен танысқан облыс әкімі Берік Уәли Ауыл шаруашылығы және кәсіпкерлік басқармасына «Семей» әлеуметтік-кәсіпкерлік корпорациясымен бірлесіп заң аясында тиісті көмек көрсетуді тапсырды.
«Жобаның маңызы өте зор. Тамшылатып суару жүйесін енгізу арқылы егіс алқаптарының өнімділігі артып, шаруашылықтың әлеуеті күшейеді. Жұмыстарыңыз табысты, берекелі болсын. Өз тарапымыздан мемлекеттің қолдауын көрсетеміз. Аудан әкімі, өзіңіз бақылап, құжат жағынан көмектесіңіз», — деп тапсырды аймақ басшысы.
Сурет: облыс әкімдігі
