Абай облысының әкімі Берік Уәлидің төрағалығымен өткен кеңейтілген аппараттық кеңесте агроөнеркәсіп кешені субъектілерін мемлекеттік қолдау шаралары және әлеуметтік маңызы бар азық-түлік тауарларының бағасын тұрақтандыру бойынша атқарылған жұмыстардың барысы талқыланды. Бұл туралы аймақ әкімдігінің баспасөз қызметі хабарлады.
Күн тәртібіндегі мәселелер бойынша ауыл шаруашылығы басқармасының басшысы Ертай Қуанбаев, кәсіпкерлік және индустриялық-инновациялық даму басқармасының басшысы Айбек Рахымбеков баяндады.
2024-жылы агроөнеркәсіптік кешеннің ірі инвестициялық жобаларын қаржыландыру бағдарламасы аясында 11 млрд теңге қаражат бөлініп, 2025- жылы 11 жобаға бөлінді. Көктемгі дала және күзгі егін жинау жұмыстарын жүргізу үшін «Кең дала» бағдарламасы аясында 2025-жылы облыс шаруаларына 9,5 млрд теңгенің 202 несиесі берілді. 2026-жылға бағдарлама аясында 14 млрд теңге көзделіп, қазіргі таңда 51 фермерге 4,9 млрд теңгенің несиесі берілді.
Ауыл шаруашылығы техника паркін жаңарту мақсатында «ҚазАгроҚаржы» АҚ арқылы 2025-жылы 13,5 млрд теңгенің лизингі беріліп, 592 техника сатып алынды. Биыл лизинг көлемін 16 млрд теңгеге дейін арттыру жоспарланып отыр. Сонымен қатар, 2025-жылы көктемгі және күзгі дала жұмыстарын жүргізу үшін облыс шаруаларына 51,2 мың тонна арзандатылған дизель отыны бөлінді. Биыл 52,8 мың тонна дизель отынына 1 171 өтінім қабылданды. Бұл – өткен жылмен салыстырғанда 1,6 мың тоннаға артық.
Облыста қой шаруашылығын дамытуға үлкен мүмкіндік бар. Осыған орай 2026–2030 жылдарға арналған салалық бағдарлама әзірленуде. Қаржыландыру «Игілік» бағдарламасы арқылы жүзеге асырылады.
Аймақ басшысы жиында аудан әкімдеріне «Ауыл аманаты» бағдарламасы аясында ауыл шаруашылығы кооперативін құруды, машина-трактор паркін жаңарту жұмысын жалғастыруды, Ауыл шаруашылығы басқармасымен бірлесіп «Кең дала» бағдарламасы бойынша бөлінген қаражатты тиімді игеріп, көктемгі және күзгі дала жұмыстарының жоспарлы көрсеткіштерін орындауды тапсырды.
«Несиелеу мен субсидиялау тетіктерінің тиімді іске асырылуы ауыл шаруашылығын дамытуға, өндіріс көлемін арттыруға және азық-түлік қауіпсіздігін нығайтуға негіз болатыны сөзсіз. Агроөнеркәсіп кешенді дамыту және ауыл шаруашылығы тауарын өндірушілерін қолдау бойынша қабылданып жатқан шаралардың тиімді іске асырылуын қамтамасыз етуіміз қажет. Мемлекеттік қолдау тетіктері нақты нәтижеге бағытталып, бөлінген қаржы толық әрі мақсатты игерілуі тиіс. Бұл ретте аудан және қала әкімдіктері, сондай-ақ, ауыл шаруашылығы басқармасы фермерлермен байланысты күшейтіп, қолдау құралдарының қолжетімділігін арттыру, инвестициялық жобаларды уақтылы іске асыру және азық-түлік қауіпсіздігін қамтамасыз ету бойынша жүйелі жұмыс жүргізуі қажет», – деді облыс әкімі.
Әлеуметтік маңызы бар азық-түлік тауарлары бойынша баға тұрақтылығын қамтамасыз ету бағытында өңірде жүйелі жұмыс жүргізілуде. Жыл басынан бері әлеуметтік маңызы бар азық-түлік тауарларының тізбесі 19-дан 31-ге дейін кеңейтілді. Бұл ретте сауда үстемесі 15% деңгейінде шектелді. Аталған шаралар инфляцияны тұрақтандыруға және делдалдардың үлесін азайтуға бағытталған.
Бүгінгі күні «Семей» ӘКК» АҚ-ның қарамағында 12 әлеуметтік павильон бар. Халықтың әлеуметтік маңызы бар азық-түлік тауарларына қолжетімділігін арттыру мақсатында қосымша 5 әлеуметтік павильон орнату жоспарланып отыр.
Аймақ басшысы әлеуметтік маңызы бар азық-түлік тауарларының бағасын тұрақтандыру үшін баға мониторингін күшейтуді және заңды бұзғандарға шара қолдануды тапсырды. Сондай-ақ, тұрақтандыру қоры өнімдерін нарыққа белсенді шығаруды және әлеуметтік павильондар санын арттыруды жүктеді.
Сурет: облыс әкімдігінің баспасөз қызметі
